Eikonakonitho lyombuto yo HIV-AIDS otali tameke nena

OSHIKONGA sha simana shokwiikonaakonitha mwene kombinga yombuto yomukithi omudhipagi gwo HIV-AIDS, otashi tameke ongula yona meti 8 Mei 2009 moshilongo ashihe notashi ka hula mEtiyali lyeti 12 Mei 2009.

•OSWALD SHIVUTE
Uuministeli wUuhaku nIilonga yOnkalonawa owo tau wilike oshikonga shika nokwa tegelewa aakwashigwana oyendji okuza poomvula 15 okuya pombanda ya ka kale yi konaakonitha. Omakonaakono ogoshali.
Omuwiliki gwUuhaku mOshitopolwa sha Shana, Omundohotola Naftali Hamata okwa ti kutya oshikonga sholudhi nduka shomvula ya zi ko mOshana osha li sha enda nawa lela noyendji oya li yi ikonakonitha.
Omundohotola Hamata ota ti nee kutya pethimbo lyomaikonaakonitho gomvula ndjika, okwa hala
unene aaihomboli noonakukalapamwe oyo unene ye kiikonakonithe. Hamata ta ningi wo eindilo lya kola lya thinda mootate moka, ye kiikonakonithe, oshoka olundji oomeme ashike oyendji oyo hayi ikonaakonitha.
‘Otwa tengeneka aantu ye vulithe pomayovi gatatu ye kiikonakonithe mOshitopowla sha Shana muule womasiku ngoka gokwiikonaakonitha ge li gatano,’ Hamata ta ti. Uuministeli wUuhaku miitopolwa yi ili noyi ili, owa tseyitha omasiku nomahala hoka aakwashigwana taye kiikonakonitha noshowo ootundi moka taye kiikonakonitha.
Omundohotola Hamata ta ti wo kutya Uuministeli wUuhaku owa tula po aaniilonga ya pyokoka nawa moshinima shika shokwiikonakonitha ombuto yo HIV-AIDS. Pu na Aapangi nAaniilonga taya ka ungaunga noonakwiikonakonitha, oku ya hunga omwenyo nosho tuu. Oshigwana otashi indilwa nee shi kiikonaakonithe momangungo omanene opo shi shiwe kutya osha thikama peni nombuto yoHIV-AIDS.
Omundohotola Hamata okwa tseyitha wo kutya mEtiyali lyoshiwike tashi ya , ano meti 12 Mei 2009, Esiku lyAapangi, nAapangi mesiku ndyoka moshitopolwa sha Shana nomiitopolwa yilwe, otaya ka kala taya yakula oshigwana paiyambo, taye shi konaakona kombinga yomikithi dhi ili nodhi ili paiyambo, mwa kwatelwa wo oku ya konaakona ombuto yo HIV-AIDS.