Eidhipago ota li zi mokwaana etegameno

Omumvo gwa ziko pehtimbo ngaandika onda li nda ithanwa ndi tye sha poshigongi shuukumwe shaa uvithi poRehoboth, koshipalanyolo kutya Ombimbeli ota yi ti ngiini kombinga yeimangeleko.?

Omwedhi October ogwa tseyika ongo omwedhi gweimangeleko moNamibia, opo shika wu shi koleke owa pumbwa ashike okulesha miifo, nokumona kutya nonuumvo konyala shika osho shi li.Esiku kehe aantu ota ya tokola kutya onkalamwenyo ndjika kayi na we ongushu kuyo.Shika ota shi tu pe omapulo ogendji ongo oshigwana naantu’ kutya ‘Omolwashike aantu oyendji ta yi idhipaga?’ Opena omayamukulo ogendji ngoka ta ga holoka, kutya aantu aankundi, kutya omalovu niingangamithi oyo ye ya undula ya ninge shoka, kutya etekepo lyuukuume noshowo euvonayi komwenyo olyo lye ya fala metokolo ndyoka.Kungame omayamukulo ngaka ka ge li nawa oshoka ita ga yi kolunzo lwuudhigu, mboka ndi itaala kutya otau etwa kokwaana etegameno.Ongo omulongwa gwa Kristus nomuleli gwegongalo itandi mwena eta ndi pitike okwaana etegameno ku indjipale nokukoke.Ngaashi ovirus huka otaku indjipala nokutaandeleka uuvu, neyamukulo kushika osho okukoleka olutu neitaalo, etegameno, ohole nelongo okukondeka ovirus yokwaanetegameno.Ondi uvite kutya oshinakugwanithwa shongeleka niilyo yayo naawiliki yayo okupopya kombinga yaashika pamwe naahungimwenyo.Onda hala okutopola shoka omishangwa ta dhi ti kombinga yeidhipago.Momishangwa dhOmbimbeli omuna iiningwanima iheyali yeidhipago, ndele kapena mpoka Kalunga a popi shuukilila kombinga yoshilonga shika sheidhipago. Aatokolihapu 9:52-54 noshowo Aatokolihapu 16;25-30, 1 Sam :31:4-5na 2 Sam 1 nehokololo ndika olya hokololwa ishewe Ondjalulahokololo 10, 2 Sam 17:23, 1 Aakwaniilwa 16:15_20 na hugunina Matheus 27:3-5 neidhipago lya Judas. Judas okwiidhipaga konima sho iitedhulula kokugwaaleka nokwa shunitha iimaliwa kaayambi aakuluntu.Nonando iiningwanima mbika oya kwatathana noku za mekwatathano ewanawa naKalunga kapuna shimwe tashi pangula oshilonga sheidhipago.Eidhipago mOmbimbeli ota li ulike eyamukulo keshonopeko, keshundulo, kuuntsa, uumbanda, nokokwaanetegameno.Otushi shi kutya Kalunga ina hala twi idhipage, ndele opo tu mone, kutya uukriste itau popile eidhipago otuna okushikonga melongo lyongeleka.Elongo lyopaKriste ota li ti ngeyi kombinga yeidhipago, na ota li zi moonzo mbali ndhoka dha tala eidhipago ongo oshilonga sheidhipago mwene onkene osho eyono lyoshipango.Aalumentu yaali mboka ye etapo euveko ndika oyo omubishopi Augustine gwo ku Hippo, momumvo 4 na Thomas Aquinas momumvo 13.Pamwe nomatompelo gakankamekwa kompango yopantshitwe noshowo eyono lyeshito lya Kalunga, eidhipago olyo etindo nokweekelahi eidhipago.Mbaka yaali kehe gumwe okwa tala eidhipago ongo uulunde, mboka waana edhiminepo notau fala omwiidhipagi mekano lyaaluhe.Nonando shika otashi tu pe olunzo olwaanawa, ita shi yi muule weidhipago. Shika osho okutala oshilonga shika palongo, omanga eidhipago olyo oshilonga shopaiuvo.Eshongo kutse olyo okumona eyamukulo lyopamaiuvo kepulo ndika. Omanga Augustine na Aquinas ya tamununamo ontseyo yetu kombinga yeidhipago okushitalela pauKriste, mbaka yaali oya li aalongwantu noya palutha oshinenenima sheyamukulo lyopakriste.Manga inaandi ya muusita onda li omutseyimpango nonda li nda longo naantu yena omaupyakadhi gompango gi ili no gi ili. Omanga nda li tandi ilongekidhile oshipopiwa shika onda adha oshitsa shimwe shoka sha dhimbiwa po kombinga yeidhipago.Oya dhimbwa kutya meidhipago omuna aaningi yaali, omudhipagi nomudhipagwa. Kakele mbaka yaali oyo omuntu gumwe.Kokutya omudhipagi oye woo omudhipagwa.Nonando shika osha fa oshishona, osho otashi gumu muule.Nonando oya dhipaga, oyo woo iihakanwa yedhipago na Jesus Christus okuli kombinga yaamboka iihakanwa.Kalunga muJesus oku li aluhe kombinga yaa mboka yena uudhigu naamboka ye li muuwehame, Ye ota kongo aluhe mboka ya kanitha etegamano noyakana.Mu Kristus esilohenda nohenda aluhe onene yi vule epangulo.Shika ota shi kutha po okuza pomupopyo gwopalongo nopampango gwa landulwa kaaPharisaji nokutu fala ku Jesus ngoka uudha ohenda.Tse ongaalongwa ye ota tu ithanwa tu ye medhina lye tu taandeleke etegameno,ndele ha ku pangula, tu uvithe eitaalo ndele ha umbanda, tu uvithe ohole ndele ha uutondwe kwaamboka taya dhiladhila okwiidhipaga, nokomazimo ngoka ga kanitha aaholike yago meidhipago.Otwa ithanwa tu kale pamwe nayo ongo iihakanwa. Kandi na esiku tandi zimine kutya eidhipago oli li nawa, a hawe ka lili nawa.Onda tegamena esiku ndyoka aantu ayehe ta ya kala nohole ya Kalunga netegameno molwonkalamwenyo ndjoka ya pewa kuKalunga kutya ita ku kala we eidhipago.Ndele elongo lyapuka lyuukriste lyuumbanda nepangulo ita li tu eta popepi nesiku ndyoka. Okulombwela omuntu kutya iniidhipaga molwaashoka ota yi moheli ita shi tisha oshoka mboka ta ya dhiladhila okwiidhipaga oya fa nale yeli moheli.Okulombwela aakwezimo lyomwiidhipagi kutya omuna gwawo nenge kuume kawo oku li moheli ita shi ya etele etegameno nohole ya Kalunga ndele uutile, oluhodhi nuuwehame.Otu na oku uvako kutya oongaaKriste natu gandje eitaalo, etegameno nohole.Oshinakugwanithwa shomulongwa kashishi okupangula ndele okuuva pamwe naalili.Ongaakuluntu natu popyeni naana yetu kombinga yeidhipago, ha ku kala twa tila kutya ngele otwe shi ningi ota shi vulika yi idhipage. Ndele ngele inatu shi ninga nena yamwe otashi vulika yi idhipage. Eidhipago ohali koko muumbudhi nomeholamo.Ngele owu shi omuntu ta dhiladhila okwii dhipaga ino shi mwenena shihokolola nenge konga ekwatho koChildline/Lifeline. Popya nomuniilongwa gwonkalonawa, omusita, omulongi nenge kehe omuntu ngoka ena eithano lyontumba.Konga ekwatho molwa kuume koye ngoka ena uudhigu. Otashi vulika ito ya monene eyamukulo ndele oto vulu oku ya pa uuyelele nokutopola etegameno lyoye kombinga yonkalamwenyo yawo.Sho nda popi oshipopiwa shika gumwe okwa ti ohatu popi olwindji kombinga yohole nesilohenda, otwa pumbwa okupopya kombinga yepangulo. Nonando onda simaneka omadhiladhilo ge ngame itandi tsukumwe nago.Ita tu vulu okupopya olwindji kombinga yesilohenda nohole, oshoka ndika olyo ta li tu hupitha. Nopwaana ohenda ya Kalunga kapena nando ogumwe gwetu ena ompito yehupitho. Otandi popi ongo gumwe ngoka ndi shi ondjila ndjika yomilema. Pethimbo ndili mongundu 10 onda li ndahala okwiidhipaga. Onda dhiladhila okukutha ondjembo yatate ya lukilwa noyina oshikuti ndi idhipage andola ndele onda dhimbulukwa oohapu dhomuwiliki gwaagundjuka, a popile oshiwike shimwe manga edhiladhilo ndyoka inaa li yandje a tile ku Matheus 6:34’ Ino ipyakidhila nesiku lyangula, oshoka ota li kala nomaipyakidhilo galyo. Ina shi pumbiwa okugwedha kuudhigu tawu ya esiku kehe’.Onda dhimbulula kutya kungame ngaka oga li omaipyakidhilo kombinga yiinima mbyoka tashi vulika itayi piti po.Onda li nda dhiladhila kutya omasiku gandje ota ga kakala nuudhigu nuuwehame mboka nda li ndi uvite pethimbo ndyoka. Ndele shimwe shomoohapu ndhoka osha kumike ndje ndi dhiladhile shilwe. Esiku ndika halyo likale lyahugunina lyonkalamwenyo, oku na ongula nonkwawo ishewe. Esiku kehe ota li ya nompito yalyo ompe.Sho nda thikama kohi yombwili ya luudha onda mono uuyelele, nuuyelele mbuka owa wilike ndje ndi zemo momilema.Sigo uuna ndoka wa kala momilema ito vulu okutseya omilema, nokwaanetegameno hoka taku zi moka.Ndele ondi li mpaka okugandja etegameno ta li zi muuyelele nompito yokukalamwenyo.Onda hala okupopya naamboka ta ya dhiladhila okwiidhipaga, tseya kutya owa shitwa kuKalunga eku hole ena ohole yaashi kutumbulwa, kutya ngoye owa yona shithike peni, nenge omaupyakadhi omanene ge thike peni.Ngoye owa shitwa ongo omagano muuyuni na otashi pula ethimbo opo wu tseye nkene omagano ngaka taga longithwa muuyuni mbuka.Kamu na sha muuyuni mbuka shoka to vulu okwiidhipagela, ha iimaliwa, hamukadhona nenge omumati,nenge uupyakadhi wuthike peni wu vule omwenyo gwoye.Nonando wu kale wu wete omilema dhe kukundukidha nuudhigu woye wafemanya kambadhala wu konge ekwatho kwaamboka ta ya keelele eidhipago. Dhenga ko Childline/Lifeline 061 232221 nenge tuma osms ko nomola 0811222400. Tseya kutya opena aatseyi ya hala okukwathela molwaashoka oya hala wu kale nomwenyo opo wu longithe oshitalenti shoye ngoye wu tyapule
onkalamwenyo yoye ishewe.