Ehuliloshiwike lya faalela yatano

AANTU ye li yatano oya si miiponga yiihauto pethimbo lyOpaasa, Opolisi osho ya lopota ngaaka.

Aantu yaali oya si omanga yane ya li ya ehamekwa noonkondo, sho iihauto iyali yi idhenge omitse mumwe uusiku wOlyomakaya.Oshiponga shika osha ningilwa popepi na Wlotzkasbaken komunkulofuta.
Moshitopolwa shokuumbugantu, aakalimo yomOvenduka yatatu oya si sho ohauto yOtoyota (yObaki) ya kandoma mondjila yopokati ka ka Liindili na Keetmanshoop, uusiki wEtitano.
Omukwatakanithi gwehangano etondokinkugo lya International SOS’s West Coast Safety Initiative, Aubrey Oosthuizen, okwa ti oshiponga shokomukulofuta osha ningilwa kuumbangalantu waampoka tapu tungwa oshidhindi shomeya kOmina ya Areva, popepi na Wlotzkabaken lwopotundi onti: 21h00.
Ohauto yObaki yo 4X4 yi na onomola ya Venduka, ya li tayi zi ko Henties Bay oyi idhenge mu yimwe yi na onomola ya Mbaye, mwali mu na aantu aakuluntu yaali naanona yatatu – ya li yu uka ko Swakopmund.
Omuhingi gwohauto ndjoka yObaki okwa li u umbwa mo mohauto e ta sile mpoka. Ofamili ndjoka ya li mohauto ndjoka ya li yu uka ko Swakopmund, oya kanitha tate gwawo nombwa. Oshikonso oshidhimimililo sha Muni gwa Swakopmund, osha li tete mo omkulukadhi gwomusamane nguka nokanona kawo koomvula 14, ya li ya patekene miinyanyu yohauto yawo ndjika.
Oonakuhupa moshiponga shika yane, ayehe oye li mIipangelo mOvenduka. Oosthuizen okwa ti mondjila yokuya nokuza koondoolopa dhokomunkulofuta omwa li iihauto oyindji noonkondo pethimbo lyOpaasa. Okwa ti iihauto yi li 1 200 oya li ya yi ko Swakopmund mEtine potundi onti: 18h00.
‘Otwa li tu na iihauto yi li 689 mye ya moSwakopmund mowili niihauto yi li 324 ya zi mo mowili. Nguka omwaalu gwiihauto omunene noonkondo gwa monika pOpaasa, muule woomvula ntano dha pito,’ Oosthuizen ta popi.
Omukuntu gwOpolisi moshitopolwa sha Karas, Komufala gwOpevi, Josephat Abel, okwa ti aantu mboka ya si moshiponga shohauto mondjila yopokati ka Liindoili na Keetmanshoop oyoJerina Straus (42)Malcolm Straus (44) na Lara Adams (41).
Abel okwa ti ohauto ndjika oya gu ko kopata e tayi kandoma sho egulu etayiyela limwe lyokomeho lya topa. Ndalaiva Chris Adams (40) naanona yaali: Chris Lee Adams (110 na Coleman Straus (6, oya hupu moshiponga shika.
Okanona hoka koomvula 11 na ndalaiva oya li ya haukulilwa mOshipangelo shEpangelo po Keetmanshoop, ihe oya ka tuminwa kOvenduka. Okanona koomvula hamano oka zi mo ina ka ehamekwa nande okashona.
Moshiponga shilwe shohauto, ololi yimwe yOkampani ya Palm Africa Limited oyi idhenge momulamba gu li popepi nofaalama ya Naute.
Abel okwa ti ndalaiva gwololi ndjika okwa ehama momutse na okwa li a falwa kOshipangelo shEpangelo sha Katutura.
*Omukalimo gumwe po Warmbad, Karl Fransman (22), okwa si omeya momulonga gwa Orange popepi nofaalama ya Chapella yi li mondhingoloko gwa Warmbad.
Fransman okwa li aniwa ta ta taaguluka omulomga gwa Orange okuza ko South Afrika shaa li paveta pamwe nayakwawo yatatu.
Opolisi oya popi kutya aantu mbaka ayehe Aanamibia na yatatu mboka ya hupu, oya ningolwa oshipotha shokutaaguluka oongamba kashi li paveta.