Ehangano lyoomina ta li kongo oshipambu

E
HANGANO lyoomina lyepangelo Epangelo Mining olya hala oku mona iipambuliko moomina dhasimana dho uraana noshowo okumona uuthemba owindji ngaashi tashi vulika wokukonga iikwamina moshilongo.

Ehangano olyo tuu ndika olya hala epangelo opo li gandje iipambuliko yalyo mbyoka lina oku yi li pa opo li vule okufutila iilonga yalyo. Moonkundathana nondunda yoomina ya Namibia omathimbo ga piti, omunambelewa omukuluntu gwEpangelo Mining, Eliphas Hawala okwa ti oshinima shotango a hala okuninga okumona kutya Namibia okwa kuthombinga moshitopolwa shokufula ouraana. Okwa tengenekwa Namibia taka ninga omutitano muuyuni mokulonga ouraana okuya pomimvo 2015. Okwa ti Epangelo Mining olya hala wo okuya miitopolwa yilwe yokumina ngaashi mbyoka yomamanya guuyamba. Okwa ti ye ina itaala kutya osha pumbiwa opo epangelo li thiminike omahangano goomina opo ga pe Epangelo iipambuliko ndele okwa ti okwa hala shika shiningwe oku pitila moonkundathana.Kombinga ya ngele Epangelo olya hala okumona iipambuliko momina ya Swakop Uraium ye okwa zimine kutya eeno olina ehalo oku mona mo iipambuliko.Omina ya Swakop Uranium oyi na omwaalu gwo uraana ogwindji ngoka gwa monika muka sigo oompaka, okwa ti onkene oshi li mondjila okutala kutya opwa ningwa eindilo kEpangelo Mining li kuthe ombinga mokukala niipambuliko mehangano ndyoka. Okwa endulula natango kutya epangelo ina li itaala melongitho lyethiminiko ndele omeuvathano ndyoka tali etele oongundu adhihe uuwanawa. Hawala okwa ti Epangelo Mining oli na oku mona uuthemba wokukonga nokumina pathigathanopo nomahangano galwe, sha hala okutya nando ndika olye pangelo lyo ita li ningilwa andola pondhipi.Okwa ti oya tsu epangelo omayele kutya oshaanawa ngele epangelo tali pe ehangano ndika uuthemba poompito odhindji wokumina , onkene uuwanawa walyo wokukala lyepangelo otawu ka longithwa olundji.Okwa endulula ishewe kutya otashi kala muuwanawa woshigwana ngele epangelo olya gandja iipambuliko yalyo moomahangano gayooloka goomina kehangano lyalyo Epangelo Mining.Pethimbo ndika epangelo olina iipambuliko yooperesenda 50 mu Namdeb, ooperesenda ndatu mo Rossing Uranium, na ota li kundathana na De Beers Marine Namibia opo li mone iipambuliko yooperesenda 50 mwaandika.Hawala okwa ti shoka sha simana ooshoka kutya Epangelo Mining olya kolekwa pashimaliwa opo li vule okukuthombinga miilonga yokumina ouranium moshilongo.Okwa ti opo pulongwe oshimaliwa , opena okulongithwa oshimaliwa. Onkene iipambuliko mbyoka ngele oya pewa Epangelo nena ota li vulu okukuthombinga miilonga yokukonga iikwamina noshowo okufutila iilonga yalyo. Epangelo Mining olya tamekithwa iilonga sho lya pelwe oodola omiliona yimwe netata okuza ku holomende. Hawala okwa ti Epangelo Mining ota li kongo iimaliwa yokulongitha miiyenditho yokushininga mbyoka ta yi longekidhwa kewilikongundu.Okwa ti mbika ota yi ka endela pamwe newiliko lyomapungulo ga nika ekanitho opo ehangano lyaa tulwe moshiponga shoku gwila moongunga. Okwa ti okwa hala Epangelo likale ehangano ta li longo oshimaliwa ndele halyo li kale aluhe ta li indile opo li pewe oshimaliwa kaafuti yiifendela.