Ehangano lyoohi lya shonopeke ethimbo lyokwiiyakula

AANIILONGA haya longele ehangano lyoohi lyEtosha Fishing Company mOmbaye oya lombwelwa kutya ota ya ka pewa elondodho lya shangwa ngele oya pitilile ethimbo lyominute 45 mesiku mokulongitha okandjugo, nenge moku kanana omakaya nenge ya yi pondje noku ka popya ashike pethimbo lyiilonga.

Ehangano olye ya lombwele woo kutya omalondodho ngoka ngele oga ningi gatatu nena omuniilonga ota ka pulakenwa komeho gongundu yokuvulikitha. Aaniilonga oya li taya nyenyeta kutya omathimbo gamwe oya pumbwa oku ya kokandjugo iikando oyindji. Yamwe yomaniilonga mboka ya pewa elondodho molwaashoka ya longitha ethimbo olindji oku ya kokandjugo oya tindi oku shaina omishangwa dhomalondodho ngoka.Iilonga yawo oha yi landulwa kutya ota yi ende ngiini notundi ndjoka yo ha ya kloka uuna ya yi miilonga noshowo uuna ye na mpoka taya yi ngaashi kokandjugo. Omuwiliki gwehangano ndika, Pieter Greeff okwa ti iilonga oku longa iilongomwa pofabulika ndjoka oya gu pevi okuza pootona 18 mowili oku ya pootona 14 mowili. Negwopevi ndika olyo lya ningitha opo oonkatu ndhika dhi katukwe, oku gandja oombapila dhomalondodho komuniilonga kehe taka longitha ominute dhi vule 45 mesiku limwe lyiilonga sho keeli pehala lye lyiilonga nokulonga.Okwa ti kutya oku ya kokandjugo nenge eli pondje ta nana omakaya nenge eli pondje ta popyapopya hasho shina oshilonga,ndele shoka shilipo ooshika kutya aaniilonga oha ya thikama pondje ta ya popi ashike omanga iilonga ya thikama, nopehulilo lyomwedhi oya tegelelwa okufutwa.Greeff okwa ti aaniilonga mbaka oha ya pewa uufudho wominute 15 wotee ongula nokomatango, kakele kotundi yimwe yomwiha pokati kotundi 13h0 sigo 14h00. Konima sho iizemo yiilonga ya shuna pevi, Greeff okwa ti ehangano olya tulapo omathano goku talatala omainyengo gaaniilonga, naangaka oge ya ulukile nawa kutya aaniilonga omathimbo gamwe oha ya kala ashike yeli mohapu pondje manga iilonga ya lala.Okwa ti aaniilonga mboka yena uupyakadhi woshinena tashi endelele nenge mboka yena oku nwa omiti omanga ye li miilonga itaya landulwa pamukalo nguka shampa ashike yo yena ombapila yomundohotola tayi ulike uupyakadhi mboka.