Ehangano lyaalongi lya hala yi iwilike yoyene

EHANAGANO lyopashigwana lyaalongi [NANTU] ota li tsikile noku nika nika elombwelo lyepangelo ndyoka lya lepeke ootundi dhawo dhiilonga sigo opotundi ontine yokomatango.

Amushanga ndjayi gwehangano ndika , Basilius Haingura okwa ti elombwelo kutya aalongi naya kale pomanongelo sigo opo tundi ontine ota li kondjithathana nomulandu gwopashigwana.Haingura sho a popitha oshigongi shewilikongundu lyomanongelo moWindhoek oshiwike sha yi okwa ti, oshigongi elalakano lyasho oku zaleka aalongi uunongo nontseyo nkene taya longo niinima ya guma aalongi.Haingura okwa ti shimwe shomiinima mbika ooshoka epangelo ta li yeleke aalongi naaniilonga yokwaalukehe yepangelo, sho shika ka shi li mondjila.
Okwa ti aalongi sikola oha ya longo iilonga yawo no ihaaya pula nando olutaima, na okwa kunkilile epangelo kutya ootundi dhiilonga odha pumbwa okukundathanwa nawa.
Okwa ti okushishi kutya epangelo ita li ka vula oku futa olutaima nomulandu otagu ka mona iihuna naashika otashi ka sitha aalongi uunye.
Okwa ningi ethaneko ta ti peha lyoku lelepeka ootundi dhiilonga dhaalongi, omawiliko gomanongelo oge na okutala kutya aalongi oya longa iilonga yawo nawa, na etalelo olina okuningwa pomanongelo.
Okwa ti elombwelo lyuuministeli ka li na oshilonga naandika ota li thiminike aalongi ya longe ootundi odhindji, unene tuu omolwa iizemo iitayi hokitha yondondo ontimulongo naandjoka ontimulongo nontiyali.
Omunashipundi gwo Nantu, gwoshitopolwa, sha Khomas, Dankie Katjiuanjo okwa gwedha ko ta ti ehangano ka li na uudhigu nootundi dhiilonga, okutya ashike shika ina shi pumbiwa kwali shi ningwe omulandu nenge elombwelo oshoka, aalongi oha ya longo nale ootundi odhindji.
Okwa ti epangelo olya pumbwa oku tala iinima oyindji mbyoka ta yi nwetha mo yo ota yi gumu elongo moshilongo, kakele kootundi dhiilonga dhaalongi.
Okwa ti epangelo na li tale komatungo gomanongelo ngoka gu udha aalongwa noshowo ompumbwe yiilongitho.
Katjiuanjo okwa gwedha po woo ta ti oondjambi nomauwanawa gaalongi nago oga pumbwa okwoopalekwa opo ngaka ga hile aalongi aawanawa kelongo oshoka oyendji yomuyo ota ya thigi po elongo okuya palwe.