Ehangano lya Fransa ta li tungu oshitaasi sholusheno lwombepo

EHANGANO lyoko France lyedhina InnoVent olya dhiladhila okutunga oshitaasi shokudhiga olusheno okulongitha ombepo.Oshitaasi shika osha dhiladhilwa okutungwa kuumbugantu waBaye, no ta shi ka longa oonkondo dholusheno lwomegawatt 300 pahokololo ndyoka lya gandjwa meindilo lyombapila opo ehangano ndika li tameke okutunga po oshitaasi shika.

InnoVent okwa gandja eindilo lye kewilikongundu lyomalusheno(Electricity Control Board).Ehala ndika ta li longitha ombepo ota li ka tungwa paandondo dhi li ne, na omupepo kehe ta gu tungwa otagu kala ta gu vulu okudhiga olusheno lwomegawatt ndatu.Ondondo yotango ota pa dhikwa omipepo ndhoka tadhi eta po olusheno lwomegawatt 30, naandhika ota dhi ka tulwa miilonga momumvo 2011.Inno Vent oku na, nale ehangano moSouth Africa, ha li ithanwa Inno Wind ndyoka ta li tungu po itaasi yolusheno iyali po Saldanha Bay no popepi na Grahamstown.InnoWind moNamibia oha yi wilikwa komuwiliki Martin Webb omvalele ya South Africa nomukwateli komeho gwehangano ndika oye Usuta Imbili omwanakadhona gwomukokoliperesidende Sam Nujoma.Ka pe shiwike ngele Imbili oku na ontseyo yasha yopautechnica nenge yopauengineer.Pa uyelele mboka wu li meindilo lyombapila ,Inno Wind okwa hala oku landitha olusheno nduka koshitopolwa shErongo noshowo kaalongithi yalwe yolusheno.Oprojeka ndjika oyo ota yi kala ontiyali yokudhiga olusheno paku longitha oonkondo dhombepo.Mu lyo 1 Apilili 2007 oECB oya gandja ombapila yokweetapo olusheno ta shi pitile mokulongitha oonkondo dhombepo kehangano,Aeolus Power Generation, ndyoka li li elongelokumwe pokati ka United Africa Group nehangano lyaa Holland.Ehangano ndika olya li lya ulike edhila dhilo, lya lyo okutunga oshitaasi sholusheno lwombepo po Liindili nenge poBaye , ndele sigo omutenya nguka omadhiladhilo ngaka ina ga ya miilonga natango.Pahokololo lya John Kaimu omupopiliko gwa Nampower, edhiladhilo lya Aeolus olyi ikwatelela kondando ndjoka Nampower ta kala ta landa olusheno kehangano ndi.Kaimu ta ti sigo oompaka oyi ipyakidhila ne uvathano lyokulanda olusheno, Kaimu ta ti sho a pulwa koshifo shika.Omakwatathano gokweenditha olusheno oga pwa nale shoka sha kwata po osho owala euvathano li na sha nondando unene tuu sho no kaapena ompango ndjoka tayi wilike elongitho lyoonkondo ha dhi ka nokulongululwa.