Banner Left
Banner Right

Ehangano lomahooli laNamibia otali kongo omukulunhuwiliki nande oli na oshibofa shi li komhangu yoilonga

Immanuel Mulunga

Ehangano lopashiwana lomahooli laNamibia ledina National Petroleum Corporation of Namibia (Namcor) ola shiivifa omhito yoilonga yomukulunhuwiliki nande ehangano nomukulunhuwiliki walo mukulu, Immanuel Mulunga, aveshe otave litwala komhangu yoilonga.

Mulunga oo kwa li ha wilike ehangano lomahooli lepangelo oule weedula hetatu, okwa li a kufwa moilonga momafiku 08 Auguste 2024 molwoibofa ya yooloka, mwa kwatelwa omaliko inaa pitikwa ongushu yoshimaliwa shi fike peemiliyona N$50 okudja kehangao olo hali lande omahooli ovakwaita ledina Enercon.

Momafiku 20 Auguste 2024, okwa li a tula mo oshibofa shokukufwa moilonga shihe li pauyuki komhangu yoilonga.

Namcor, naye okwa tulila mo Mulunga oshibofa momafiku 08 Novemba 2024 taa popi kombinga yokatongotongo nokudanena omikandailonga.
Ombelewa yomukulunhu woilonga oshivike sha dja ko oya koleka oibofa ei koThe Namibian.

“Oshibofa osho sha etwa kombelwa yoinima ya pamba oilonga kuMulunga omwa kwatelwa omapopyo okukufwa moilonga shihe li paveta shi li ominge noNamcor,” Omunambelewa akula woinima ya pamba oilonga Kyllikki Sihlahla osho a ti ngaho.

Okwa weda po: “Momafiku 08 Novemba 2024, oNamcor okwa li a twala oshibofa komukulunhu woinima ya pamba oilonga shi li ominge naImmanuel Mulunga, tai popi kombinga yokatongotongo nokundanena omikanda doilonga.

Oibofa aishe natango oi li mombelewa yoipambele yoilonga tai konakonwa. “ Nande opu na oita yopaveta, Namcor okwa li a shiivifa omhito yoilonga momafiku 20 Desemba 2024, tai kongo omukulunhuwiliki weedula nhano.

Eshiivifo ola ti, moilonga yomukulunhuwiliki omwa kwatelwa okulonga newilikongudu lovakulunhuwiliki mokweeta po omikalo defimbo lile di ete ongushu yovakufimbinga.

Omanga Mulunga a nukila pomutenya kutya ita ti ko sha, ovayambididi vaye ova holola onghumwe eshi omhito kwa li ya shiivifwa nande opu na oibofa yokomhangu yoilonga inai potokononwa.

Omupopiliko woNamcor Utaara Hoveka Oshoondaxa okwa ti etokolo lehangano li shiivife omhito yoilonga yomukulunhuwiliki, nande opu na oshibofa shokomhangu yoilonga inashi potokononwa, okwa li la xwaxwamekwa koinima ya yooloka tai lalakanene kutya eyekomesho nonghalonawa yehangano otai twikile.

Okwa ti ekuto lomhito ei omulandu wopaumwene oo itau lidopo nande moihokolola yopaveta yokomhangu yoilonga. “Namcor okwa itavela neenghono kutya exulifepo loilonga yaMulunga okwa li la yuka notali dulu okupopilwa,” Osho a ti ngaho.

Hoveka okwa ti Namcor okwe litula mo mokuliufa koinima yopaveta aishe omanga natango ta wanifa po oshinakuwanifa shaye shovakufimbinga mokukwashilipaleka elelo liwa.

“Ehangano ola itavela monghatu omo la fikama, onghee nee, oli udite kutya osha yuka okupula komesho nomulandu wokukuta omukulunhuwiliki,” Osho a weda po ngaho.

Hoveka okwa ti kutya nee oindjemo yokomhangu yoilonga oi li nghahelipi, Namcor ota twikile okuninga omafaneko omonakwiiwa.

Okwa ti okushiivifa omhito otaku pitike ehanganao li mone mo nokunana ovakufimbinga va pyokoka ovo tava dulu okuweda koilalakanenwa yalo, nokukwashilipaleka kutya ole lilongekidila keshe shimwe osho tashi holoka.

Oule weedula, ehangano ola kala li li meengunga dakula, ekondjelo leenghono, omalundilo oingangamwifi, elongifo loshimaliwa papuko, omatulo pedu ovakulunhuwiliki nosho yo omapopyo oulingilingi.
MuSeptemba 2023, Namcor okwa li e na eengunga di fike pobiliyona imwe oshinghwanyu omuwoi.

Omahangano amwe oo haa landifa kuNamcor okwa li a ninga omatilifo kutya otaa ka kufa onghatu yopaveta, mwa kwatelwa nokupata ehangano lomahooli lepangelo.

MuApril 2024, epangelo okwa li la lotoka onghuwo yaNamcor, tali yandje oshimaliwa shi fike pobiliyona imwe oshinghwanyu mbali sha futwa meyukililo kwaavo ve na eengunga davo di li kehangano eli.

“Ongoufemba wehangano wokulundulula nokuyambula po oilonga yalo, Namcor okwe litula mo mokweeta mo elelo lipe olo tali tu kumwe naasho ta lalakanene,” Hoveka osho a ti ngaho.

Hoveka okwa ti etokolo lokukonga omukulunhuwiliki mupe otali holola elitulemo lehangano mokutota oinima ipe neyokomesho, tashi kwashilipaleke kutya ehangano natango oli li pondodo iwa mongeshefa omu.

“Pauxupi, etokolo laNamcor lokushiivifa omhito youkulunhuwiliki onghatu iwa ya ningilwa okulalakanena kutya elelo lehangano noilonga oi li nawa, manga natango tali kaleke po okuninga omalunduluko neyokomesho, nosho yo okupitika oihokolola yopaveta i kale ye lifikamena po.”

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!

Latest News