Egumbo lya meme Ruth lya hanagulwa po koshikungulu

EGUMBO lya meme Ruth Kasheya-David momukunda Onamulunga popepi nOnakayale mOmbalantu mOshitopolwa sha Musati olya hanagulwa po ombinga yimwe kombepo onene yoshikungulu ndjoka ya li yi iteyele momukunda gwawo ngoka Onamulunga ongulohi yeti 6 Januari 2011.

Kakele kehanagulopo lyegumbo, ombepo yoshikungulou ndjoka, oya vundula mo wo omiti dhawo dhomiye , omano nosho tuu omigongo, ndhoka dhimwe dhi idhenge moondunda dhiipeleki megumbo lyawo moka noku dhi hanagula po wo.Omatungo omanene gaali, limwe lyomala omugoyi na limwe lyomala gaali omanene odha hanagulwa po sho dha kuthwa iipeleki nokuteyagulilwa omitenge, go omakuma taga mbonyoka po. Olugumbo lwawo lwegumbo, ano olukutu olwekuma nombinga yimwe onene yolugumbo ndoka olwa mbonyagulwa po kombepo yoshikungulu shoka thiluthilu. Meme Ruth David, ngoka omushelekadhi, ano nakuthigwapo komusamane gwe a tseyika nawa kwali tate Justus (Luhonga) David, ota ti oshikungulu shoka ine shi mona mo nale momukunda gwawo moka, osha endela pamwe nomvula onene, niipeleki sho ya kuthwa ko komatungo hoka, ano koondunda hoka, iinima mbyoka yali meni lyoondunda moka, ngashi oosikopa, Iitaafula, iipundi, oombete, omakumbatha, omalapi gokoombete, iizalomwa yi ili noyi ili, Oodokumende, omambo, omausila, iikwatelwa yoombiga naayihe ya li moka, oya lokwa nokuyonagulwa komeya gomvula noshowo kontsi onene ya ningilwa moka koshikungulu shoka. Meme David ta ti oyindji yomiiyonagulwa mbyoka itayi ka longithwa we noshe mu tula moluhepo olunene kumwe noluvalo lwawo naanegumbo lye. Kakele Omusita tate Hosea Emuno Iiyambo, ngoka e li Omugalikaneni gwegumbo lyawo, ano lya meme Ruth noluvalo lwawo na nakusa tate David naanegumbo, oye a lombwele The Namibian kutya meme Ruth okwa mona oshiponga oshinene shoshikungulu nokwa yonenwa oshindji shomeliko lye. Omusita Iiyambo ta ti oshiponga shika osha pumbwa oku shiwika koshigwana sha Namibia nokuuyuni, opo aasihenda, ano Aasamaritana, ya kwathele meme Ruth muupyakadhi nomekanitho lye ndika enene kumwe naanegumbo lye.Kakele kiinima yawo mbyoka ya tumbulwa metetekelo, omatungo gawo ngoka omanene gaali nago oga mbonyagulwa po koshikungulu shoka. Tashi ti ga kuthwa omitenge dhiipilangi niipeleki mbyoka ayihe wo ya teyagulwa po kombepo yoshikungulu shoka kumwe nomiyelo nomakende. Oongulu wo dhimwe ndhoka dha hupa ko notadhi monika dha fa dhi li hwepo ngele ou li kokule, nadho odha thigwa dha tenda omisa koshikungulu nokumvula ndjoka. Meme Ruth, ngoka a kala omupangi kwali noku li ngashiingeyi moshipundi shevululuko, ota ti ye ke na we naanaa oshimaliwa shokutungulula eyonagulo lya ningilwa egumbo laywo koshikungulu shika nokwa pumbwa lela eyambidhidho enene okuza kaasihenda. Oku mu kwathela ngaa mpoka taya vulu. Kakele kegumbo lya meme Ruth, oshikungulu shoka osha dhenga wo omagumbo gaakalimo yalwe momukunda gwawo moka, ngashi aniwa lya tate Kamati Immanuel, lya meme Saarah noshowo gaakalimo yamwe wo.’Oshikungulu shika oshe tu enda nayi, oshe tu yonagulila omaliko getu notu li twa pumbwa lela ekwatho enene okuzilila kaasihenda. Otatu ka pandula ayehe taya ka tokola oku tu yambidhidha moluhepo nomompumbwe yetu ndjika onene. Otwa thigwa pomutenya kumwe naanona naanegumbo yandje. Onkee otwa pumbwa eyambidhidho enene,’ meme Ruth David ta ti ngawo.Omolu eyambidhidho lyaanona yawo yamwe, meme Ruth oye na po Okefe yawo yIikulya tayi adhika mondoolopa yAutapi yedhina Faantu Restaurant, moka ha mono mo ngaa sha shokuhupa nasho kumwe negumbo lye. Meme Ruth ota hokolola nohenda onene kutya mbotsotso nenge oombotsotso odha li dha teya oshitopolwa shimwe shOkefe yawo ndjoka okupendukila Etiyali lyoshiwike shika, ano eti 18 Januari 2011. Lago enene inaya kutha mo sha. Taku tengenekwa kutya oya li ya hala ashike oshimaliwa, shoka inaya adha mo. Kwaangoka nenge kwaamboka nee mu na etokolo lyokuyambidhidha meme Ruth David, otab monika kongodhi yonomola 0812899039.