Egandjo lyiikulya mOhangwena otali shongola

SHINIMA shOokampani dhoka dha pewa ootendela dhokufala iikulya yoshikukuta komahala hoka ya pumbiwa itadhi shi enditha nawa miilonga yadho, otashi piyaganeke oonkambadhala dhEpangelo okugandja iikulya mbika koshigwana moshitopolwa sha Hangwena.

Shika osha popiwa kOmukuluntuwiliki gwopevi gwOshikondo shOmkwathelo gOpaulumompumbwe mOmbelewa yOmuprimaminista Gabriel Kangowa, oshiwike shika.
Kangowa okwa ti nonande omafalo lgomagadhi gokuteleka otali ende nawa, lyuushako wuusila wepungu noondooha dhoohi otali shongola noonkono.
Ootendela dhokufala iikulya yoshikukuta hoka ya pumbiwa odha gandjelwe momasiku 15 ga Oktoba 2008, na okwa tegelelwa iilonga mbika yi ka tsikile sigo omuMaalitsa.
Okampani ya Etameko yi li mOngwediva, oya li ya pewa otendela yokufala ootona 105 dhomagadhi gokuteleka na sigo opo mpaka otayi shi enditha nawa lela.
Nande ongaaka, Okampani ya Onawa Mills yokOmbalantu – otayi shongola miilonga yayo na pethimbo ndika, oya fala ashike ootona 45 dhuushako wuusila wepungu womootona 3 917 ndhoka yi na okukala ya fala.
Okampani ya Ongolo Trading yomOvenduka, ndjoka ya pewa otendela yokufala ootona 119 dhoondooha dhoohi, oya ndopa thilu-thilu okuninga ngaa na okondaraka yawo oya kanselwa.
Kangowa okwa ti onkalo ndjika oyi li nee tayi piyaganeke oonkambadhala dhEpangelo okugandja iikulya koshigwana. Kepulo kutya uushako wuusila wepungu wa li u na okukala wa falwa koshigwana pethimbo ndika, Kangowa okwa ti Okampani ndjoka ya pewa otendela oyi na okulonga noshitopolwa shoka ya pewa shuukilila molwashoka egandjo lyiikulya olyi ikwatelela wo ku mpoka pu thike oondunda dhokupungula iikulya, opo ku yandwe okutula mo iikulya ya pitilila.
Ihe pethimbo ndika, Okampani ndjika oyi li konima noonkondo negandjo lyiikulya. ‘Moshitopolwa sha Hangwena, otwa gandja okondaraka ku Namib Mills na Kavango Mills, ndhoka adhihe dha li dha indile iilonga yokufala iikulya koshitopolwa shika yoometrika-tona dhi li 10 dhuusila wepungu, opo ya yakwathele Onawa Mills ngoka e na uupyakadhi mokugandja iikulya,’ Kangowa ta popi ngaaka.
Namib Mills na Kavango Mills oya lombwela wo ya kwathele megandjo lyiikulya moshitopolwa sha Musati, mpoka Onawa Mills e li wo ta nyengwa okugandja nawa iikulya.
Moshitopolwa sha Shana, Namib Mills otashi enditha nawa lela. Omjukuluntuwiliki gwOpevi mOshikondo shi na sha nomakwathele gaantu komikunda mElelo lyoshitopolwa sha Hangwena, Natalia Ndaitwah okwa ti oopelesenda 80 dhaantu moshitopolwa shawo odha tala miikulya yoshikukuta. Okwa ti onkalo ndjika oya etwa po kefundja noshikukuta shomumvo gwa zi ko, unene tuu momahala gokuuninginino woshitopolwa.
Okwa ti Eenhana, Engela,Oshikango,Omulonga, Ohangwena,Endola, Ondobe nOngenga, odho omikunda dhoka dha gumwa noonkondo koshikukuta. Kangowa okwa ti Ombelewa yawo oya tumina Onawa Mills yi endeleleke iilonga yawo yokugandja iikulya yoshikukuta.