OMAPYA haga tekelwa ngoka ge li komunkulo gwomulonga gwaRange po Noordoewer noshowo po Aussenkehr oga yi ishewe kohi yomeya, konima sho omulonga nguka gu udha omeya nayi.
Ekungululo ndika olya tegelelwa li ka etele aanamapya momudhingoloko ngoka ekanitho enene.Omulonga ogwa pitilile ominkulo dhagwo sho gwa uvadha omeya sigo opuule woometa 8,5 ongulohi yetitano lya yi. Shika osha landula sho omeya ga patululwa okuza moodama mbali moSouth Africa ndjoka ya Vaal noya Bloemhof. Omunawino miinima yomeya, Guido van Langehoven okwa ti uule womeya getitano kawa li uunene wu vule mboka womwedhi gwaziko mboka wa li oometela 8,9. Van Langenhoven okwa ti ina pa tegelelwa we oomeya ga patululwe moodama ndhoka ishewe omasiku ngaka. Ehala lyokuyakula aayenda lya Norotshama Lodge pomulonga olya gumwa komeya sho oondunda hamano dhi li pooha dhomulonga dha yi omeya. Omuwiliki gwehala ndika, Juan Claassen okwa ti eyonuko olya faathana naandiyaka lyefundja lya zileko, kakele ngele omeya oga itumbu shapitilila nena eyonuko ota li kala enene. Kansela gwa Karasburg, Paulus Ephraim okwa ti omvula onene po Noordoewer oya yonagula omagumbo mpoka sho omeya ga tondokele momagumbo goposhilando shoka. Metitano oodama ya Hardap no ya Nute odha egululwa woo opo omeya ngoka ga tondokelemo ogendji ga pitithwemo.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
