… osha fimana opo ovanyasha ve lishangife va ka hoolole
Eengudu dopolotika oda holola ehalo lado lokumona eyambidido lovanyasha momahoololo oo twa taalela taa ka kala ko muNovemba opaupelesidente nomutumba wopashiwana.
Eshi oshe ya konima okakomisi komahoololo kedina Electoral Commission of Namibia (ECN) ka tameka nomalishangifo ovahoololi Omaandaxa, fiyo omulotete laAuguste.
Keshe Omunamibia e na eedula 18 ile di dulife po okwa wana okuhoolola muNovemba.
Okandidate kouhamushanga wongudu yovanyasha yoSwapo Willem Amutenya oka ti Swapo okwa kala nokupopila ekufombinga lovanyasha mopolotika.
“Oshinima eshi osha eta ovanyasha vahapu popepi nopolotika, mwa kwatelwa nomahoololo opashiwana oo hatu lilongekidile. Otwa mona ovanyasha vahapu tava kufa ombinga moivilo yopolotika nomoyoongalele yopolotika, mwa kwatelwa naayo yokomalungula. Natango pamhito ei, ohatu tu omukumo ovanyasha vakwetu opo va kwashilipaleke nokutya ove lishangifa opo va ka hoolole.”
Amutenya okwa ti okwa mona ovanhu vahapu ve li momikweyo domalishangifo ndee natango ota pula opo va twikile nokuninga oshinima shi li ngaho. “Oushitwe owe tu pa, fyee ovanyasha oshinakuwanifa opo tu kwashilipaleke onakwiiwa yopolotika yoshilongo eshi. Otu vahapu hatu dulu okuhoolola, onghee nee, natu fimanekeni oshinakuwanifa eshi nokulishangifa oukalata vomahoololo ndee konima hatu ka yandjeni omawi etu.”
Amutenya okwa pula vali okakomisi komahoololo opo ka kwashilipaleke kutya ovanyasha otava yakulwa pambili nomayakulo otaa yandjwa meendelelo opo ku kelelwe omikweyo diledile.
Duminga Ndala omuwiliki wovanyasha wongudu yoLandless People’s Movement (LPM) okwa ti osha fimana unene ovanyasha opo ve lishangife voo va dule okukahoolola shaashi otashi ka vatela okulundulula omilandu.
“Okulishangifa opo u ka hoolole oufemba wa fimana wovakwashiwana noshi li omukalo u na eenghono wokukufa ombinga momilandu depangelo, onghee nee, osha fimana ngee ovanyasha tava kufa ombinga momahoololo opo va vatele mokutunga po omilandu odo tadi yambidida osho va hala naasho sha pumbwa okuningwa.” Ndala okwa twa ovanyasha omukumo opo va kwatele komesho oshinima eshi opo va kwashilipaleke kutya ovakalelwa po novakwatelwa mo mepangelo.
Okwa popya kutya ongudu yavo oya tameka okuninga eekambaina komalungula opo i nane ovanyasha.
“Natango vali, otwa kala hatu talele po eenhele da yooloka opo tu twe omukumo ovanhu va dule okuholoka komahoololo momwaalu muhapu. Oshivike ashike sha dja ko, okwa li tu na oshivilo shetanga lokeemadi koRehoboth. Otwa lombwela ovanyasha opo va ka hoolole momwaalu muhapu.”
Natango, pelesidente Nangolo Mbumba naye okwa pula ovanyasha opo ve ke lishangife va dule okuhoolola eshi kwa li yee e lishangifa kOlympia mOvenduka ongula yOmaandaxa.
“Osho omukanda weni ongovanamibia mu dule okuwanifa po oufemba weni wokuhoolola ndee ta mu hoolola ongudu ile omunhu oo mwa hala opo e mu kalele po moshitopolwahoololo ile moshilongo ashishe.”
Mbumba okwa ti ohashi pula ashike ominute di li 15 opo omunhu e lishangife.
Omunashipundi woECN Elsie Nghikembwa okwa ti Ovenduka otai ulike omwaalu mushona wovanyasha ovo tave lishangifa opo va ka hoolole ndee ta pula ovanyasha opo ve ke lishangife omanga omafiku inaa pwa ko.
“Katu na nande efimbo lokuundulila komesho omafiku okulishangifa,” Osho a ti ngaho.
Pelesidente wongudu yoIndependent Patriots for Change Panduleni Itula naye okwa li e lishangifa poPhiladelphia Church moKatutura Omaandaxa.
“Itandi ningi nande omupolofeti wonakwiiwa, ashike, otwe lineekela moIPC kutya otu na okufindana moshilongo omu. Itashi ka kumwifa nge nande ngee Swapo a mono ashike eepelesenda 29 momahoololo,” Osho a ti ngaho. Itula okwa pula ovanyasha opo va kufe ombinga mokuninga onakwiiwa iwa.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
