Omwaalu woibofa yomafyo ounona nomahepeko moshilongo ashishe tau i pombada owa eta onghumwe yakula moshiwana notashi pula ouyuki, omilandu deameno nosho yo epangelo li kalele po oinima.
Oivike ivali ya pita, omundilo owa ya neemwenyo dounona vavali mOvenduka kolukanda ledina One Nation moshikandjohoololo shaTobias Hainyeko konima meme wavo e va fiya meumbo metonatelo lamumwainamati manga kwa li a ya koilonga.
Moshiningwanima shikwao, olutu laIngrid Massdorp (5) okwa li la monika momulamba koshi yonhopa, la monifwa oixuna noli na omadidiliko kutya ola ningilwa omahepeko opamilele kOkahandja momafiku 20 Marsa.
Oshiningwanima eshi osha eta epulo la fimana: Ounona vaNamibia ove na ngaa eameno?
‘INAPA NINGWA SHA SHAWANA’
Oshilyo shopaliamente shongudu yoLandless People’s Movement (LPM) Utaara Mootu okwa li a eta oshiningwanima shedipao laIngrid mopaliamente, kapu na sha ningwa po kombinga youpyakadi ou, osho a ti ngaho, unene ngaa okudja kelelo lopashiwana.
Mootu oshivike sha dja ko okwa li a pula omanyamukulo okudja kuminista woipambele yomeumbo, omatembu neameno, Lucia Iipumbu, kutya oministili yaye otai ningi po naana shike kombinga yoimbuluma tai i pombada, omakwatongonga nomadipayao a kwatela mo ounona moshilongo.
Eshi kwa li ta popi noDesert Fm Etitatu, okwa ti okwa li a hala okukwatakanifa efyo laIngrid nounona vakwao ovo va kana mafiku aa, ngaashi Spencer Nakale, oo kwa li a kana momafiku 28 Desemba 2020.
“Oshiwana osha pula ashike komesho pa fa puhe na eshi sha ningwa po. Noshibofa shomafiku aa shokaana keemwedi hetatu Simone Roy, oo kwa li a dipawa kovadali vaye.
“Ei oikumungu oyo ndi wete kutya okwa li tai piyaaneke neenghono ndee otwa pumbwa okutameka okwiipopya,” Mootu osho a ti ngaho. Okwa ti okwa li a hala okuuda kutya oministili, kaume kopolifi yaNamibia, otai ka vatela ngahelipi opolifi opo i kwashilipaleke kutya omakonakono okwa ningwa pefimbo kombinga yekwatokeenghono nedipayo laIngrid.
Ofamili yaye oya holola kutya oya handuka shaashi kapu na ouyelele wa wana okudja kopolifi.
ELONGIFO NAI LOIKOLWIFA
Mootu okwa ti omahepeko oo haa ningilwa ovakainu nounona ohaa etwa kelongifo nai loikolwifa.
“Kapu na elitulemo nokuungaunga noshinima osho, sho natango otashi eta osystema i dope okupotokonona oibofa. Ondi wete kutya oshinima eshi nasho ohashi pitike ovanhu va twilile nokuninga oinima ei, osho hashi eta oimbuluma ihapu,” Osho a ti ngaho.
‘EENGHENDABALA DOPAMUHANGA’
Paulus Hawanga wokehangano ledina National Organisation of Parent in Education okwa ti ovakufimbinga aveshe meenghalamwenyo dounona nave uye kumwe, mwa kwatelwa omalelo eedoolopa, ovaleli voikandjohoololo neefamili, opo va ete po omilandu odo tadi yandje eameno kounona.
“Okwa li sha pumbwa okula omnghendabala yopamuhanga opo kuyandjwe omalukalwa aa,” Osho a ti ngaho. Hawanga okwa ti ehangano laye otali popile okuyandja ehongo longushu kovanhu aveshe.
Okwa ti otali kondjifa ovakwashiwana opo vaha kale va tala mepangelo unene, ashike ova pumbwa okukonga omaxupilo avo vene.
“Natu yandjeni ehongo kovanhu vetu. Ohatu pitifa eeveta, ashike ovanhu kave shi eeveta edi dihapu. Olyelye a pumbwa oku va honga?” Osho a pula ngaho.
Hawanga okwa ti okuhe na owino noilonga ohaku eta ovadali va kale itava dulu okuvatela eefamili.
“Ngee ito dulu okutunga omudingonoko omo keshe okaana taka kala ke udite ka manguluka, taka mono ehongo noke li meameno, epangelo nali kufe ko oshiholelwa,” Osho a ti ngaho.
OMAKONAKONO TAA ENDE KASHONA
Natango, Saveria Ishidhimbwa, oo a kanifa okaana kaye momundilo kOne Nation, okwa ti oshiningwanima oshe mu kufakeshe shimwe – omafano, oilanda nomafano ounona oo a kala nao okudja ngaa eshi va dalwa.
Omunandjungu woshiwana mOkahandja Johannes Gaseb okwa ti oshiwana ashishe otashi lili Ingrid mokati koibofa aishe yomadipayo modoolopa.
Okwa ti ovanandjungu voshiwana otava fininike opolifi opo i endelelife omakonakono.
Inakulu yaIngrid, Dolly Maasdorp (54), oo e mu tekula okudja pedalo, okwa ti Ingrid okwa li a twalwa kofikola ongula yomafiku 20 Marsa, ashike inaa lukila vali keumbo.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
