Eekeelelo lyokuhehela aaniilonga natango ita li tulwa miilonga

EINDIKO lyelongitho lyomukalo gwokuhehela aaniilonga pakathimbo moNamibia natango ita li tulwa miilonga.Shika ita shi vulu okuningwa molwaashoka Ompangu yopombandambanda moshilongo ina yi gandja natango etokolo lyawo ngele eutho ndika ta li keelele omahangano ga hehele aaniilonga uuna ge na ompumbwe, ndele ita ge ya kutu miilonga ta yi kalelele, oli li pakotampango nenge ahawe.

Metokolo mompangu yopombanda moVenduka, omupanguli Raymond Heathcote okwa tindi eindilo lyepangelo, nolyo Ministeli yAaniilonga, nomuPeresidende kutya eindiko lyokulongitha aaniilonga molupe lwokuyahehela li kuthwe po, opo omukalo nguka kaagu longithwe.Ompangu yopombandambanda moshilongo natango oya tegelelwa yi gandje etokolo lyawo kutya oshinima shika otashi kondjitha ekotampango.Omukalo gwokuhehela aaniilonga ogwa keelelwa pakatopolwa 128 kOmpango yaaniilonga yomumvo 2007.Ekeelelo ndika olya li lina okuya miilonga muMaalitsa ndele olya kalekwa momi 27 ga Febuluwali nuumvo, sha pitile mompangu yopombanda , molwaashoka ompangu onene yoshilongo oya li ya tegelela okuninga etokolo keindilo lyaningwa komahangano ngoka haga landula omulandu gwehehelo lyaaniilonga.Etokolo meindilo ndika ina li gandjwa natango.Metokolo lye, metitano omupanguli, Heathcote okwa ti osha fa shi li ngeyi kutya okatokolwa hoka mompango ndjika ota ka kondjitha ekotampango.Oshinima, oshiwanawa okuhwepopeka onkalo yaaniilonga, osho a ulike.Ndele ngele aatotimpango otaya keelele aantu mboka ya hala okulonga pamukalo nguka opo ya mone iiyemo okwiipalutha noshowo okupalutha omazimo gawo nena ompango yatya ngaaka otashi vulika yi monikwe ya fa kaayi li pakotampango.Naashika hasho lya li elalakano aatotimpango ye yi totelepo.Okwa tindi eindilo lyepangelo nokwa lombwele epangelo li fute, iifuta yopampango yehangano lyo African Personnel Services moshipotha shika.