Omukunhu wehongo koshitopolwahoololo shaMusati Paulus Kashiimbi okwa pula eefikola dopaumwene di li omuwi odo di li moshitopolwahoololo inadi nyolifwa opo di pate meendelelo.
Momukanda wa nyolwa momafiku 26 Novemba 2024, Kashiimbi okwa li a popya kombinga yokatukulwa kokatendo kehongo komudo 2020 oko taka kelele eefikola dopaumwene tadi longo dihe na omikanda. Okatukulwa natango oka twikila okukelela ovanhu vaha ninge eefikola inadi nyolifwa.
“Molwoshinima eshi eefikola edi tadi longo shihe li paveta, tadi yande eetundi ongeefikola dopaumwene ile da kwatakanifwa neefikola dopaumwene odo da nyolifwa, otadi teya okatendo kehongo komudo 2020 noda pumwa okupata meendelelo,” Kashiimbi osho a ti ngaho.
Elombwelo laKashiimbi okwa li la yandjwa omafiku aheyali omanga ofikola kwa li inai ya mefudo omwedi wa dja ko, okwa li la udifa nai ovadali shaashi otava ti etumwalaka ole ya unene moule wokafimbo kaxupi.
Ovadali vamwe otava ti oshinima eshi osha yuka ashike keefikola dimwe di li mOkahao. Ashike nee, Kashiimbi Omaandaxa okwa lombwela oThe Namibian kutya opu na eefikola di li lwopomuwoi inadi nyolifwa dopaumwene tadi longo moshitopolwahoololo shaMusati, nande omwaalu ou otau dulu okukala wa koya po opa.
“Mupya munene, itandi dulu okuyandja omwaalu kondadalunde shaashi ombelewa natango oye lipyakidila tai ningi omakonakono nokukandulapo oshikumungu eshi.”
Okwa ti eefikola edi da monika mo oda tameka okulonga omanga dihe na omikanda adishe odo da pumbiwa, mwa kwatelwa yoo nokuhanga oipumbiwa imwe nokumona ediminino olo la pumbiwa. “Elombwelo okwa li la yandjwa keefikola adishe moshitopolwahoololo ododa lopotwa ile da monika kutya otadi longo iandi linyolifa nawa.”
Kashiimbi okwa ti ombelewa yehongo, omaunghulungu nomifyuululwakalo otai fimaneke ashike eameno nonghalonawa younona.
“Eshi osha kwatela mo okukwashilipaleka ongushu yehongo, nomufindahongo ngee ou li ngaa mondjila nosho yo omauhongelwe ovahongi keefikola oku, noinima yoo oikwao ya pamba ehongo oyo ya pumbwa okuwanifwa po omanga ofikola inai nyolifwa, opo ku kwashilipalekwe onghalonawa yehongo lounona.”
Okwa ti ombelewa yavo oya mona omaupyakadi oo a etwa koshinima eshi shokupata eefikola edi nokwa pula ounona va va dengwa koshinima eshi opo va dengele ovataleli voikandjo yavo ku talike kutya otaku ningwa nghaleipi.
Ovatalelishikandjo otava vatele okutambuloifa ounona ovo va kumwa koshinima eshi peefikola depangelo di li popei opo ku kwashilipalekwe kutya ova mona ehongo, sho a weda po ngaho.
Ashike nande ongaho, okwa pula ovadali opo va kale alushe nokukoleka ngee eefikola dopaumwene oda nyolifwa opo kuyandwe oshinima eshi monakwiiwa.
Ovadali novatekuli vounona kofikola yedina Liberty Heritange School mOkahao, momukanda wa nyolwa koshilyo shelelonongelo lofikola Nelago Shilongo Etitano, okwa lombwela Kashiimbi kutya elombwelo laye ole ya pefimbo la puka.
Ova ti vali ova tambulifa nale ounona vavo, ova landa nale nomindjalo dofikola noipkwafifohongo nova futa nale ofuto yofikola.
Ofikola yedina Liberty Heritage otaku tiwa oye linyolifa noministili yehongo, Omaunghulungu nomifyuululwakalo shaashi oi na oshitai kOngwediva, ashike oshitai shayo shokOkahao otashi longo inashi nyolifwa.
“Ohatu denge omufindo kutya LibertyHeritage School, nande oi li ashike oshitai, oya nyolifwa fiyo opondodo 12 notai dana onghandangala yakula mokudenga po omumbwe yakula yehongo lopombada mOkahao,” Ovadali osho va ti ngaho.
“Fyee, ongovadali, ohatu pula nefimaneko linene oministili yehongo opo i pitike Liberty Heritage School Okahao i twikile nokulonga momudo 2025, omanga tai manifa omilandu dayo dokulinyolifa.
Otwa itavela okukaleka ounona vetu komaumbo omanga oministili inai nyamukula.”
Omufitaongalo woLiberty Heritage Private School Festus Negumbo okwa lombwela oThe Namibian omaandaxa kutya otava ka yandja omanyamukulo ngee va popi nomukulunhuwiliki wehongo kombinga yoshikumungu eshi.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!