Dhompilameno tadhi kondjele ehala etiyali

OONGUNDU dhompilameno dha Namibia odha ti elalakano lya dho oku sindana momahogololo ngoka ta geya pehulilo lyomwedhi nguka.Ndele aatseyinawa ota ya ti oongundu ndhika ota dhi lalakanene ashike ehala etiyali molwaashoka oSwapo oyo natango ya tegelelwa yi ka sindane momahogololo ngaka oshoka yo, oyi yi li komeho okuyeleka noongundu ndhika.

‘Ondi wete kutya ongundu ndjoka ta yi ya puutiyali oyo yi ni po.ORDP oyo ta yi ka ninga ompilameno yopambelewa konima yomahogololo gomwedhi nguka.Oyo ongundu ompe opo ye ya mondambo omanga oongundu ndhoka oonkulu ota dhi kambadhala.okuhupa,’omutseyigwopolitika Graham Hopwood a ti.Ehangano lye lyo Institute for Public Policy Research(IPPR) olya li lya ningi shoka ha shi ithanwa o Afrobarometry survey omumvo gwaziko mu Novemba, epekapeko ndika olya li lya pe oRDP opereesenda omugoyi dhomawi okuyeleka nooperesenda ne dhomawi ndhoka dhamonika koDTA.Hopwood okwiitaala kutya oRDP oyo ongundu yompilameno ndjoka ya vulu okulongekidha iigongi yi na aantu oyendji, shoka ta shi ulike kutya oyina eyambidhidho okuyeleka noongundu oonkwawo dhompilameno.Iigongi yongundu ndjika oya li woo ya ningwa miitopolwa mbyoka yi na aakwashigwana oyendji unene muumbangalantu woshilongo moka omathimbo ga piti mwa li ashike hamu ningwa iigongi koSwapo.Ongundu ndjika ota yi longitha omukalo gwiikonga yomahogololo okweenda egumbo negumbo, mbyoka pomathimbo ngaka ya fala sigo oompoka kutya yamwe yomaantu yomiilando nomahala galwe mpoka puna aayambidhidhi yoSwapo ya kala kaa ya uvite ombili., ngaashi moVenduka, Otjiwarongo, noshowo muumbangalantu.’Kandi shiwo kutya shika ota shi eta iiyimati yithike peni ndele osho omukalo omupe gwokukonga eyambidhidho moNamibia,’Hopwood ta ti.RDP oye ya po 2007 molwaashoka oSwapo aniwa oya nyengwa okuhumithakomeho oshilongo pahapu dhomusamane Hidipo Hamutenya gwoRDP.’Eholokepo lyongundu ndjika olya eta po, ombinga yimwe ompe mopolitika yoshilongo. Oya pendula okatalekonawa kaakwashigwana okutsikila nopolitika,’Hamutenya osho a shanga moontentekelihapu momanifesto yongundu ye.Pahapu dha Hopwood ongundu onkwawo ndjoka omuntu toti oyo ta yi ningi ompilameno ta shi vulika oondjoka yoDTA, nonando oya kala nokushuna monima oya kala nokukondja nuulaadhi okuza 1994.Ongundu ndjika ota yi longitha iikundaneki nawa oku popya kombinga yiinima yi ili no yi ili, yi na ekwatathano nondambo yopolitika ndjoka yi na okukala yithike pamwe kaadhani ayehe.Ongundu ndjika oya ningi iigongi iinene pomahala mpoka pwa li kwa talika ogo omahala gayo papolitika miilando ngaashi Opuwo, nOkakarara.Sho a popitha oshigongi oshinene pOpuwo omathimbo ga ziko omuperesidende gwoDTA omusamane Katuutire Kaura okwa tile, okuwete omahogololo gomwedhi nguka ge li ashike pokati kongundu ye noSwapo, na ongundu ye oyi na elalakano oku ka indjipaleka iipundi ya yo moshigongi shopashigwana.’Shoka, twa thikamena po aakwashigwana ota ya ka landa,’osho a ti.Oshipalanyoigidho shongundu osho’ngoye owa pumbwa okuningwa nawa’ shi li ngaashika sha li oomvula ntano dha piti.Hopwood okwiitaala kutya ekondjithathano moCOD pethimbo lyoomvula ne dha piti olya nkundipike ehilo lyongundu ndjika mokati kaakwashigwana.Ndele omuleli gwo Cod,Ben Ulenga okwa dhiladhila shi ili.Pethimbo lyoshigongi poMalinda Ulenga okwa tile aaNamibia oyiilongekidha oku kuthako ongundu ya Tanga koshipundi shahala okutya aaleleli mboka ya li poshigongi shoSwapo moTanzania. Okwa ti oCOD oya kala ompilameno uule womimvo 10 onkene ethimbo olya pya opo yi kutheko epangelo.’Ekalepo lyo COD ka li shi ashike oku kala yi kale ongundu yompilameno ndele oya hala woo oku ninga epangelo esiku limwe, opo nayo yi humithekomeho oshigwana sha Namibia..Ongundu oya ti olutandu moSwapo olwa kwathele oCOD opo yi kale yi na ompito okukuthako epangelo.Okwa ti kepulo kutya olye ta ningi ongundu yompilameno, ota shi ikwatelele kwaangoka ta sindana, ngele oCOD oyo ya sindana nena oSwapo oyo tayi ningi ompilameno pamwe noongundu adhihe dhi li mekondjelo lyomahogololo.Ndele shika ota shi zi kaahogololi, kutya ota ya gandja shike koongundu.Omupopiliko gwoCOD omusamane Natji Tjirera okwa ti ongundu ye oyi na aakalelipo moshilongo ashihe mboka ta ya ningi iikonga okuyelithila aantu.Okwa ti woo ongundu ye oya nyanyukwa sho uumbapila womahogololo wa nyanyangidhwa kehangano lilwe kaalishi Namprint oshoka COD ngashingeyi ota ka mona omawi ge gagwanapo.Hopwood okwa ti oongundu ndhoka dha egamena keyambidhido lyopamuhoko odho ngaashi SWANU, RP, APP, MAG, DPN, NDMC, nongundu yuukomuni ndjoka ha yi holoka ashike uuna pe na omahogololo.