Dave Smuts omupanguli mOmpangu yopombanda

OMUNAWINO gwoompango a tseyika nawa moNamibia, Dave Smuts ota ka tameka iilonga ongo omupanguli takalele gwOmpangu yOpombanda moshilongo mu February omumvo tuuka.

Euliko lye ongo omupanguli otali tameke mulyotango lya February 2011. Etseyitho ndika olya ningwa oku za kombelewa yomupanguli omukuluntu metitano. Omauliko gaapaunguli yamwe ngoka ga ningwa pamwe naandika oga kwatela mo euliko lyomupanguli omukuluntu gwa South Africa nale, Pius Langa, noshowo omupanguli gwompangu yopakotampango gwa South Africa, Kate O’Regan, mbaka otaya kala aapanguli yompangu Onene ya Namibia. Iilonga yawo ota yi tameke okuza mulyotango lya February omumvo tuuka sigo opehulilo lya January 2012. Opwa ulikwa woo aapanguli yokulipo ye li yane yompangu yopombanda. Omupanguli moshipundi shevululuko, gwa Botswana John Mosojane ota kala omupanguli gwokulipo gwa Namibia okuza mu April sigo omu May omumvo tuuka. Mosojane okwa li omunashipundi shokommissi yomahogololo yiithikamena ya Botswana. Na okwa yi mopenzela momumvo 2008. Aapanguli ooyakwawo yatatu oyo Harald Geier, mengestrata, gwopashitopolwa pOndangwa, AK Simpson nomukuluntu gwoompangu dhopevi muuministeli wUuyuki, Petrus Unengu mbaka ota ya longo okuza mu January sigo omu April omumvo tuuka. Mbaka ayehe oya longele nale ongo aapanguli yokulipo yOmpangu yopombanda ya Namibia omathimbo ga piti. Smuts naye okwa longa iikando oyindji ongo omupanguli gwokulipo mompangu yopombanda momimvo 1996, 1998 noshowo 2006. Okwa tamekele iilonga yuuhahende, mehangano lyoohahende lya Lorentz na Bone 1980. Okwii longa oompango moUnivesiti ya Stellenbosch, noshowo mwaandjoka ya Harvard ko America. Oye ishewe a totapo ehangano lye kwathelo lyopaveta lyedhina Legal Assistance Centre momumvo 1988, nokwa kala omuwiliki gwalyo sigo 1992. Oku li wo mewilikongundu lyombaanga ya Standard, niilonga ayihe mbika ote yi ethapo omumvo ta guya omanga inaa tameka iilonga ongo omutokolihapu.