COD ta yi pula kembo lyaahogololi

ONGUNDU yo COD oya hala oku ulika aayaluli yiithikamena noshowo aatseyimpango opo ya konakone embo lyomadhina gaahogololi, ndyoka taku tiwa oli na omayooloko.

OCOD oya ti oya hala yi mone omadhiladhilo nomagwedhelepo ge li mondjila omanga inaa yi katukila Okomisi Yomahogololo ya Namibia onkatu.Poshigongi shiikundaneki moVenduka omupopiliko gwoCOD, Natji Tjirera okwa ti ota shi vulika shi kale kaashi na ondunge yasha opo omahogololo ga ye komeho omanga inaa pa tseyika kutya aantu yethike peni yiishangitha ongaahogololi. Okwa ti onkalo yembo lyaahogololi ota li vulu okweeta po omudhingoloko gwaahogololi yiiluli mboka na yo tashi vulika ya hogolole muuwanawa wepangelo. Tjirera okwa ti konima yomahokololo kutya opwa li omafukilo momahogololo ga zile ko, ongundu ye ina yi hala yi ethe oshinima shika inaashi konakonwa.Okwa ti COD oyi itaala kutya omalundilo ngoka ga endululwa koRDP unene tuu komuwiliki gwongundu ndjoka Hidipo Hamutenya, ye okwa li gumwe gwaaleli mongundu ta yi pangele ,oge na omwago.Tjirera okwa ti Hamutenya na lombwele oshigwana nkene omahogololo ga li haga fukilwa na efukilo ndika olya li, li thike peni, na oolye ya li ya gumwa kulyo.Okwa tsikile ta ti ita shi vulika Hamutenya a dhiminwe po momalundilo ngaka , oshoka ye okwa li oshilyo shopolitburo yoSwapo, na ngele omahogololo oga li ga fukilwa shili, nena ye naaleli ooyakwawo mo RDP oya li oshitopolwa shoku fukila.