COD ta ti omahangano gaaniilonga ga landitha po iilyo yago

ONGUNDU yo Congress of Democracy[COD] oya lundile ondunda hangano yomahangano gaaniilonga[NUNW] kutya ndjika oya landitha po aaniilonga nenge iilyo yayo.

COD okwa ti NUNW aniwa okwa etha aaniilonga unene tuu pethimbo ndyoka ya pumbwa ekwatho lyehangano ndika.Ongundu ndjika oya tamaneke NUNW ta yi ti okwa kanitha omalalakano ge, nongashingeyi aakwatelikomeho yehangano ndika aniwa oye li miikaha yepangelo nomiikaha yaagandji yiilonga.Natji Tjirera gwo COD okwa ti aaleli yehangano lyaaniilonga oya kala ta ya ulike ya fa ye na sha nuuwanawa waaniilonga komutima manga ta ya kondjele iipundi yopolitika ta ya lyatelele komitse dhaaniilonga.Tjirera okwa gandja oshiholelwa shaaniilonga yopomina ya Otjozondu mboka ta ya mono iihuna, ta ya longithwa shivule nopuusino’ omanga aniwa omuperesidende gwo NUNW, Alpheus Muheua na amushangandjai gwo NUNW,Evilastus Kaaronda aniwa inaa ya hala okutya sha kombinga yaaniilonga mbaka yopOtjozondu.Tjirera okwa ti woo, ota shi kumitha sho Muheua na Kaaronda ya li yakwatela komeho okupopila omukuluntu wiliki gwa TransNamib a shune miilonga omanga nguka kee heshi omuniilonga ndele oye omugandji gwiilonga.Okwa pula ngele, Titus Haimbili omuniilonga lela, evule aaniilonga yopomina ya Purity Manganese ya Otjozondu.Tjirera okwiitaala kutya aawiliki yaaniilonga oya kanitha ombepo ‘yuurevolusi ‘na ngashingeyi ota ya kondjele okwiikutitha pompito kehe taya mono, nopamukalo nguka aniwa oya dhimbwa oshinakugwanithwa shoku gamena uuthemba waaniilonga.