Botswana a mono etulilohala lyokupungula oondongelwa mOmbaye

OSHILONGO shaBotswana ngashingeyi oshi na ehala lyetulilo nonando ka shi na efuta lyasho shene.Ndhika odho oohapu dhomuwilik omukuluntu gweHangano lyomatuliloskepa lyaNamibia(Namibia Port Authority) omusamane Bisey Uirab konima sho ya shayina euvathano pokati kehangano lye nepangelo lya Botswana opo li longithe ehala petulilo skepa lyOmombaye.

Euvathano ndika olya shainwa ku Uirab na kOmufala gwa Botswana moNamibia omusamane Norman Moleboge.Ehala lyoombinemeta 36 000 li li kuumbugantu wetuliloskepa lyaMbaye popepi noshitaasi sheshina lyokolutenda, ota li pe Botswana ompito yo ku kala ena ondjila yokulongitha efuta okweeta mo iipumbiwa ye.Pamukalo nguka Botswana ota ka longitha woo ondjila ya TransKalahari okututa iilandomwa ye mbyoka ta yi zi kiilongo yilwe.Peha opo tuu mpoka Botswana ota kala nokupungula noshowo okukutha oondongelwa noku dhi andjaganeka nokufala mpoka a hala dhi falwe..Pahapu dha Uirab Botswana okwa etelemo nokupitithamo iilandomwa yootona 5 000 sho a longitha etuliloskepa lyaMbaye omumvo gwa ziko.Sigo oompaka Botswana okwa kala ha longitha omatulilo skepa gaSouth Africa ngoka ge na ondilo noshowo haga kwata ethimbo, pahokololo lyaAmushanga Takalele mUuministeli Wiilonga nIiyenditho,Carter Morusipi.Omalanditho ogendji ga Botswana oniilongo yoEuropa.Onkene ngashingeyi sho tu na etulilo hala metuliloskepa lyaMbaye ota tu ka longa nuupu nokuhupitha oshimaliwa sho tatu etamo nokutuma mo iilongomwa yetu neendelelo nomethimbo efupi, osho a ti.Okwa ti ekonakono nkene ehala ndika ta li longithwa noshowo okutulapo iilongitho ayihe ngaashi omapungulo ngulu, ehala lyomakontainer noombelewa otaga ka pwa pehulilo lyomvula.Omukuluntu gwiikwamashina yokolutenda mUuministeli wIiyenditho nIilonga, Robert Kalomho okwa ti oshinakugwanithwa sha Namibia okugandja ompito yokulongitha efuta ku Botswana molupe lwomapandiinda giiyenditho oku humitha komeho iipindi.Okwa ti elongitho ta li eta sha, lyondjila onene ya TransKalahari ota li ka humithwa komeho unene tuu ngashingeyi sho Botswana a mono etulilohala lyiinima ye metuliloskepa lyaMbaye. Okwa ti woo okuna einekelo kutya ethaneko lyokutunga olutenda ndoka ta lu kala pooha nondjila ndjika ota shi ningwa mbala.Oonkundathana noshowo omathaneko kombinga yolutenda nduka odhili nale metifa noMbaanga Yuuyuni ota yi ka tameka mbala nomakonakono kombinga yolutenda ndoka. Kalomho ta gwedha po.Uirab okwa ti okugandja etulilohala kuBotswana oshitopolwa shehangano lye oku ninga Ombaye etuliloskepa ehogololwa mokati komakwawo.