OHOFA ya Mengestrata poKaiti oya mangulula ngoloneya nale gwoshitopolwa sha Karas, Dawid Boois konima sho inaa yi mu mona ondjo yasha momalundilo kutya okwa longitha ombelewa ye yuugavena okwiimbilipaleka nenge okwiiningila uuwanawa.
Okwa li kwaa tiwa Boois aniwa okwa taamba iimaliwa ooN$ 7500 omwedhi kehe ongo ekwatho lyo ku futila egumbo uule womimvo mbali omanga ye a li ha zi megumbo lya holomende. Boois okwa li a ti kena ondjo moshinima shoka sho matamaneko geli 24 guulingilingi, ndele okwa zimine kutya okwa li a taamba iimaliwa mbyoka omanga a li ha zi megumbo lyepangelo. Sho a gandja etokolo lye mengestrata, Sunsley Zisengwe okwa ti epangelo olya ndopa oku shi ulikamo lelalela kutya Boois okwa longitha ombelewa ye paulingilingi opo iipe, nenge iiningile uuwanawa.Omweeti gwoshipotha okwa li a ti, Boois ,shoka okwa li omukuluntu pambelewa ye okwa mbandameke mboka yeli kohi ye, naambaka oya li yewete yaana oonkondo oku katuka, opo andola ya mweneke efuto lyiimaliwa mbyoka. Zisengwe okwa ti epangelo olya ulike ashike kutya Boois ina gandja elongelokumwe lye kaanambelewa mboka ya li taya longo noshinima shika, moonkambadhala dhawo okustopa iimaliwa mbyoka yaafutwe we. Zisengwe okwa ti epangelo ina li vula okuulika kutya Boois okwa longitha oonkondo dhe okukandulapo mboka ya li yatsondumbo noshinima she shokupewa iimaliwa yokufutila omagumbo.Zisengwe okwa ti nonando Boois okwa ihumbata nokwaana esimaneko nonomukalo omwiinayi mokulonga naanambelewa yelelo lyoshitopolwa, kombinga ye yoku kala megumbo lyepangelo, noshowo oku taamba iifuta yekwathelo lyokufuta egumbo nguka iniihumbata paulingilingi mokuninga ngaaka. Oveta ota yi utha kutya uuna omunambelewa eli megumbo lyepangelo, nguka ina pitikwa opo a pewe ekwathelo lyokufuta egumbo.Oku tala kuumbangi mboka wa gandjwa osha fa Boois a li kuuviteko, nokwa fa a li uuvite kutya iimaliwa noshowo egumbo lyepangelo ayihe okwa li ena oku yi pewa oshita.Omutamaneki, Pieter Smit okwa ulike kutya epangelo ota li ka kondjitha etokolo ndika konima ngele yeli konakona nawa. Boois sho a pulwa kombinga yemangululo lye okwa ti uuyuki owa longwa, oshoka ye kena esiku a longithile oshipundi she opo iiyetele nenge iiningile uuwanawa, nohofa oye shi ulike.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
