BH ota ka gandja Oodola omiliona yimwe ku Elcin

OMUNANGESHEFA gwOfeema ya tseyika nawa yedhina BH tate Benjamen Hauwanga, a tseyika wo naye nedhina BH, Omaandaha ga zi ko okwa tseyithila Amushangandjayi gwOngeleki ya Elcin Omusita tate Eliakim Shaanika noshowo Aanambelewa aanashilonga aakuluntu mOngeleki ya ElcinpOniipa kutya okwa tokola okugandja omagano gOodola dha Namibia emiliona limwe kOngeleki ya Elcin meendelelo ngashi tashi vulika.

Omaandaha ngoka tate Hauwanga okwa yile kOniipa nokugandja omagano gOodola/N$10,000 kOshikondo sha Elcin shoka hashi ungaunga nomukithi omudhipagi HIV-AIDS shedhina Elcin AIDS Action (EASA) nokuuvaneka wo kutya ote ke shi pa natango N$20,000, dhi ningeN$30,000 adhihe kumwe. Etokolo ndika, lyokugandja omagano gOodola dha Namibia emiliona limwe kOngeleka ya Ellcin, Hauwanga okwe li ningi konima sho Amushangandjayi gwa Elcin Omusita tate Eliakim Shaanika, moshipopiwa she shoka a ningi pethimbo lyegandjo lyoshimaliwa shOodola N$10,000, a ti kutya Elcin oku li muudhigu uunene wompumbwe yoshimaliwa.
Omusita Shaanika a ti kutya otashi ka kala oshiwanawa ngele mboka moshigwana taya vulu okukwathela Ongeleki moompumbwe dhayo, taye shi ningi nesimaneko enene nonohole yokuhola Ongeleki yawo, ngashi tate Hauwanga te shi ningi ngeyi.
Amushangandjayi gwa Elcin ta ti kutya,oompumbwe dha Elcin ndhoka dha pumbwa okukandulwa po nziya ongashi nee; Eyambidhidho mElongo lyAasita ano lyUuteologi, ekuthopo lyuupyakadhi woshimaliwa mOmbelewa onene ya Elcin, eyambidhidho lyOoprojeka oonene dhOngeleki noshowo nee okuyambidhidha Ongeleki moonkembadhala dhayo dhi na sha nendjangeko lyelongo nomadheulo gaaniilonga nosho tuu nee oompumbwe dhOngeleki ya Elcin ndhika ku Amushangandjayi gwOngeleki Omusita Shaanika, Hauwanga, ngoka wo e li oshilyo shOngeleki ya Elcin, okwa ende omwenyo nokwa tokola a gandje eyambidhidho enene kOngeleki yawo ndjika ya Elcin lyOodola dha Namibia emiliona limwe meendelelo ngashi tashi vulika.
‘Ngame Omukriste Omwiitaali, oshilyo shOngeleki ya Elcin, nondi li nda enda omwenyo unene okuuva omaudhigu noompumbwe dhOngeleki yetu tadhi popiwa ku Amushangandjayi tate Shaanika. Ngame mwene otandi pandula Kalunga kandje molwashoka oha pendje naampoka inandi tegelela ndi mone po sha kwali.
Oha gamene ndje naampoka ndali ndi wete itandi mono po we egameno nonda kala handi ipula kutya omolwashike ando. Ashike onde ke ya sigo opo kwiiyuvitha ombili kutya, Kalunga kandje oye ta gamene ndje ye oye ta pe ndje omauwanawa agehe tandi mono. Onkee onda tokola oku mu pandula tashi pitile mokugandja omagano omashona ngoka ndi na po kOngeleka ye Ondjapuki, ngashi tandi shi ningi ngeyi. Itandi shi ningi ngeno kutya ondi na oshindji lela, ihe otandi topola, tandi kutha kwaashoka ndi na po ngaa, ongolupandu tandi pandula Kalunga kandje sho ta ningile ndje omauwanawa mokati kayakwetu oyendji,’Hauwanga ta ti ngawo.
Ta lombwele nee Aanambelewa Aakuluntu Aasita Aanashilonga mu Elcin mOshinyanga moka kutya ye okwiilongekidha thiluthilu okukwathela Elcin moompumbwe dhe mpoka ta vulu. Ta ti ngashi moshinima shompumbwe yElongo lyAasita naanashilonga yalwe mOngeleki ya Elcin, okwiilongekidha okupatulula oshiputudhilokwatho shatya ngawo mOpaaka ye mOngwediva, ndele te ya pe wo omagano gOodolaN$50,000 ongetameko.
Kombinga yokugandja omagano gOodola dha Namibia Emiliona limwe, Hauwanga, okwa indila Elcin a longekidhe po ngeno Elongelokalunga lyAayehe enene, li ningilwe mOpaaka yemOngwediva moka, moka Ooitaali mboka taya ka kala pElongelokalunga lyuukumwe ndyoka, ngeno ya ka umbe ongalo onene lela kOngeleki, moka ye nee naye taka umba ongalo ndjoka yOodola dha Namibia emiliona limwe.
‘Inatu mona nale omuntu e kufa. Opu na ngaa aanangeshefa oyendji ya gandja omagano kOngeleki ya Elcin, ashike inatu tsakaneka gumwe ta gandja nenge a gandja shi thike pwaashoka wa tokola wu gandje kOngeleki ngeyi. Owa tula Elcin omagulu nota vulu okweenda ngeyi ishewe nawa. Kalunga ne ku yambeke, ye ne ku landule apehe mpoka wu li,’ Omusita tate Phillipus Henock ta ti nokupandula tate Hauwanga ngawo.
Omuwiliki gwa Elcin AIDS Action, Omusita Nehemia Sheefeni okwa ti kutya shoka sha ningwa po komusamane Hauwanga, ondjokonona onene lela, oshoka inashi ningwa nale nonando pu na aanangeshefa haya gandja shili omagano gopashimaliwa nosho tuu kehumithokomeho lyOongeleka nOmagongalo.