BH a kwathela Ongeleka ya Elcin

OMUNANGESHEFA a tseyika nawa tate Benjamen Hauwanga, mwene gwOositola dho BH moka mwa kwatelwa Opaaka onene ya Ngwediva, Omaandaha goshiwike sha zi ko shika okwa gandja omagano goshimaliwa shOondola/oN$10,000 kEhangano tali ungaunga nomukithi omudhipagi mOngeleka ya Evangelical Lutheran Church in Namibia (Elcin) lyedhina Eclin AIDS Action (EASA) e ta uvaneke te ke li pa natango N$20,000 muule womasiku twa thinda mo.

Oshituthi shegandjo lyoshimaliwa shika osha li sha ningilwa mOshinyanga oshinene shIigongi pOmbelewangeleki ya Elcin pOniipa mpoka mOshikandjongeleki sha ELCIN shUuzilo, sha li sha wilikwa kOmusita Phillipus Henock ngoka e na sha nElongo mOngerki ya Elcin nosha egululwa nEgalikano kOmusita Linus Dama Shimakeleni ngoka e li Amushanga gwOshikondo shIimaliwa mo Elcin, osha li sha kalwa kAanambelewa Aakuluntu naawiliki yIikondolonga mOngeleki ya ELCIN ngashi nee kOmusita Omuwiliki gwa ELCIN AIDS Action tate Nehemia Sheefeni, ngoka wo oye a taamba ko omagano ngaka.
Tashi kalwa wo kOmusita Eliakim Shaanika ngoka e li AmushangaNdjayi gwOngeleki ya Elcin, kOmusita Jeremia Ekandjo ngoka e li Omuunganeki gwa Elcin AIDS Action mOshikandjongeleki shUuninginino, kOmusita Halolye Nashihanga ngoka e li Omuwiliki gwOshikondo shIimaliwa mOshikandjongeleki shUuzilo, Omusita Martin Ngodji ngoka e li Amushanga Omukuluntupitithi gwa Elcin mOshikandjongeleki shUuzilo, Omusita Vili Heikki Shivute ngoka e li Omudheuli nOmukwatakanithi gwa Elcin AIDS Action mOshikandjongeleki shuuzilo, Omusita Omundohotola David Iileka ngoka e li Amushanga Omukuluntupitithi mOshitopolwa shOmapungulilo ga Luther mo Elcin noshowo nee ku meme Martha Uukelo ngoka e li Omuyaluli mOngeleki ya ELCIN, meme Mirjam Ndishishi Omudheuli mo ELCIN AIDS Action noku meme Hilya Shilongo ngoka e li Omukuluntu gwOsenda ya New Start mEenhana.
Omusita tate Shimakeleni okwa egulula oshituthi shika nEimbilo mEhangano lyonomola 643, ‘Omuwa u yambeke evi lyetu’ nokwiindila Kalunga a yambeke oshigwana she unene tuu a yambeke mboka ya tokola okukwathela aakwashigwana oyakwawo moompumbwe dhawo unene tuu Ongeleka ya Kalunga ngashi tate Hauwanga te shi ningi ngeyi.
Pethimbo ta tseyitha aayenda, aanambelewa aakuluntu naawiliki yIikondolonga mOngeleki ya Elcin, Omusita Henock, okwa tameke nale ta pandula tate Hauwanga sho a tokola okugandja omagano kOngeleki ya ELCIN. Ta ti Aanangeshefa oyendji ohaya yi kokule nOngeleki, ashike ongEleki otayi pandula ayehe mboka, itaya fadhuka po Ongeleki nota ye yi kwathele moompumbwe dhayo ngashi naanaa tate Hauwanga ngeyi, ngoka eliko lye he li topola po noku pa mo wo Ongeleki, ndjoka ya tiotwa po niikaha yowala noya pewa ashike elombwelo yi ye mokati koshigwana sha Kalunga yi ke shi uvithile elaka etowe lyEvaengeli nokuninga ayehe aalongwa ya Jesus Kristus, ya Kalunga ketu, na ngele nee tashi ya koompumbwe dhOngeleki, Ongeleki oyiikwatelela kooitaali, ano koshigwana shi yi kwathe.
Pethimbo ta taamba aayenda koshituthi shika shegandjo lyomagano ngaka gOoN$10,000 ku tate Hauwanga, Amushangandjayi gwOngeleki ya Elcin, Omusita Eliakim Shaanika okwa ti Elcin ngashiingeyi oku na oomvula 126 molwashoka okwa valwa meti 6 Januari 1883, moka mwa shashelwe Ooitaali ye li yahamano. Omusita Shaanika ta ti oomvula nee adhihe ndhoka dha zi ko, Elcin okwa kala e li momashongo gi ili nogi ili ge na sha neuvitho lyOhapu ya Kalunga mokati koshigwana noshowo ge na sha miinima yi na sha nehumithokomeho uuna tashi ya koshigwana sha Namibia.
Omusita Shaanika ta ti Elcin oku na iilyo ye yi li 673,939, Omagongalo ge li 124 ngoka taga wilikwa kAasitawiliki ye li 155 omanga mboka ye li miipundi yevululuko ye li 56. Elcin oku na Aadiakoni ye li 71 mboka taya yakula oshigwana pashilonga shonkalonawa noshowo aaiyambi ye li 5,169 sigo omomumvo 2007 kwali.
Amushangandjayi gwa Elcin Omusita Shaanika ta ti kutya eshongo enene kOngeleki ya Elcin olyo ndyoka lyoshinakugwanithwa Elcin e shi na shokugandja eyakulo lyongushu kiilyo ye ngashi ya tumbulwa metetekelo.
Okulandula iilyo ye apehe mpoka yi li, a tale kutya oyi li monkalo yatya ngiini, ngashi osho shi li mEkotampango lye.
Ano, Elcin a kale e li pamwe niilyo ye apehe mpoka yi li noshowo momaudhigu nomoompumwe dhopambepo nodhopalutu ye li mo nenge ye na. Omusita Shaanika ta lombwele aanashituthi unene tuu tate Hauwanga kutya ELCIN oku li nooitaali ye ano noshigwana niilyo ye yi li moluhepo olunene, unene tuu mboka yokIitopolwa yokomikunda, ye li monkalo odhigu yokwaana iilonga, unene tuu mokati kaagundjuka, shoka tashi eta wo Ongeleki yi kale kayi na iiyemo ngashi shi na okukala molwashoka iilyo yayo oyindji kayi na iilonga.
Omukithi omudhipagi gwo HIV-AIDS nago ogu li eshongo enene kOngeleki, molwashoka oyendji yomiilyo yOngeleki ya Elcin otayi hepekwa komukithi nguka paukililo nenge shaashi paukililo.Onkee Ongeleka ya tota po Olutu lwokukwathela iilyo yalyo mbyoka tayi hepekwa komukithi nguka gwo HIV-AIDS, talu ithanwa Elcin AIDS Action (EASA), lu kale talu ungaunga niilyo yalyo mbyoka ya kwatwa noya gumwa komukithi nguka omudhipagi nomupiyaganeki,’ Shaanika ta ti.