Aochamub oku na ondilo unene ku NBC

OMUGANDJIMULOMBO mOkampani ya MTC, Albertus Aochamub ita pewa yUukuluntuwiliki wa NBC, Ewilikongundu lya lya NBC osho lya tseyitha ngaaka mEtiyali.

Aochamub, ngoka oye aniwa a halikila opoosa ndjika konima sho ya kala omwaka mu Febuluali nuumvo, okwa li aniwa a pula NBC ondjambi yi li pombanda noonkondo.
Pamushangwa gwa pitithwa ku NBC, Omunashipundi gwEwilikongundu lya NBC Frieda Shimbulu, okwa ti oonkambadhala dhokumonene opoosa ndjika omuntu odha tameke ishewe okuza mEtiyali.
Shimbuli okwe shi koleke kuty Ewilikongundu lya NBC olya li lya ningi oonkundathana na Aochamub shi na sha nondjambi ye.
‘Konima yoonkundathana, osha kala sha yela kutya oombinga ndhika mbali inadhi mona etsokumwe. Shimbuli okwa ti kutya Ewilikongundu olya li nee lya tokola kutya Aochamub ina pewa iilonga.
Kwa landulwa etokolo lyEwilikongundu, opoosa yOmuwilikikuluntu gwopakathimbo gwa NBC, Andrew Kanime, oya lelepekwa nomwedhi.
Oonzo dhomauyelele mu NBC odha ti kutya oshiwike shika, otashi vulika Kanime oye a ka talike ko oye oopalele oopoosa yUukuluntuwiliki wa NBC.
Kanime okwa li a tameke iilonga ye momasiku 5 ga Febuluali, konima sho Bob Kandetu a kuthwa opoosa ndjika. Shimbulu okwa li a pandula Kanime sho e shi enditha nawa miilonga ye muule woomwedhi ndatu dha piti po. Metiyali lyoshiwike shika, Kanime okwa ekelehi omapopyo kutya okwa thiga po opoosa ye mu Telecom.