ANC a kangela ayehe momahogololo

ONGUNDU tayi pangele my South Afrika yo African National Congress (ANC) oya sindana po Omahogololo gAayehe nOgopaupresidende, ngoka ga ningwa moshilongo shika omasiku ngaka.

Nande ongaaka, opaati ndjika oya ndopa okumona omawi giititatu iyali.
ANC okwa mono oopelesenda 65.90 dhomomawi ge li 17,680,729 ngoka a mono mOmahogololo ngaka.
Ongundu yompilemena yo Democratic Alliance (DA), ndjoka oyo yi li ongundu yompilamena yompambelewa, oya nyauka mo noopelesenda 16.66 dhomawi 2,945,829 ngoka ya mono.
Opaati ndjoka opo ya totwa po yo Congress of the People (Cope), oya zi mo noopelesenda 7.42 dhomawi 1,311,027 ngoka ya mono. Omawi ogendji ngoka ga monika ku ANC oga pe opaati ndjika iipundi yi li 264 mOmutumba gwOpashigwana omanga molista yaaleli yopaitopolwa yi na mo iipundi yi li 126.
DA okwa mono iipundi yi li 67 mOmutumba gwOpashigwana omanga miitopolwa a mono yi li 16. Cope okwa mono iipundi yi li 30 mOmutumba gwOpashigwana omanga miitopolwa a mono 16.
Opaati ya Inkatha Freedom Party oya mono iipundi yi li 18 mOmutumba gwOpashigwana e tayi hekelekwa niipindi omugoyi miitopolwa. United Democratic Front, Freedom Frint Plus na Independent Democrat, kehe yimwe oya mono iipundi ine mOmutumba gwOpashigwana noshipundi shimwe mOmalelo gOpaitopolwa.
Opaati yo Pan Africanist Congress of Azania oya mono oshipundi shimwe mOmutumba gwOpashigwana na shimwe miitopolwa, omanga ndjoka yo United Christian Democratic Party ya mono iipundi iyali mEgumbo lyOpashigwana na shimwe mOmapangelo gOpaitopolwa.
Ndjoka yo African Christian Democratic Party oya mono iipundi itatu mOmutumba gwOpashigwana niipundi itatu mOmapangelo gOpaitopolwa.
The Azania People’s Organisation, Azania People’s Convention na Minority Front, kehe yimwe oya mono oshipundi shimwe mOmutumba gwOpashigwana. Okomisi yOmahogololo ya manguluka oya ti kutya omwaalu gwaantu yoopelesenda 77.3 oya li ya hogolola.
Omunashipundi gwOkomisi yOmahogololo, Brigalia Bam, okwa pandula AaSouth Afrika noongundu dhopapolityika sho ya kala yi idhidhimikilathana pethimbo lyomahogololo ngakaa.
Bam okwa ti shika otashi ulika kutya AaSouth Afrika oyu uvite ko opolitika nuundemokoli. Aataleli yomahogololo yopaigwana oya ti kutya omahogololo ngaka oga li ga manguluka noga li wo pauyuuki.
‘Opaati adhike odha sindana nena, ihe uundemokoli owo omusindani omunene,’ Bam osho a popi ngaaka.
Konima yetseyitho lyiizemo yomahogololo ngaka, Omupresidende gwa ANC Jacob Zuma okwa ningi eindilo kAaSouth Afrika ya fumvike okwaainekelathana, hoka ta ti kutya okwa li kwa piyageneka oshigwana pethimbo lyiikonga yomahogololo. Zuma okwa ti South Afrika ita vulu we okwiitula miinima ya pita po, ta tsikile kutya, ANC ota ka eta po Epangelo tali ka kwathele aantu momaupyakadhi gawo ngoka ye na.