Amushelelo ota kongo ongudu ipe yopolitika

Michael Amushelelo

Oshilyo shikulu shongudu yoNamibia Economic Freedom Fighters (NEFF) Michael Amushelelo osha ti otashi kongo ongudu oyo ya hala okumutambula ko omunhu e na oukwatya woukwaita.

Amushelelo okwa li a fiya po ongudu yoNEFF sha landula eshi ongudu kwa li ya kufwa mo meengudu dopolitika kokakomisi komahoololo kaNamibia kedina Electoral Commission of Namibia (ECN).

Eshi okwa li sha ningwa konima oNEFF kwa li ya dopa okuyandja olopota youyelele nghee ya longifa oshimaliwa shayo ngaashi tashi pulwa kokatendo komahoololo komudo 2014. Ongudu yoChristian Democratic Voice (CVD) nayo okwa li ya kufwa mo meengudu dopolotika koECN.

Amushelelo okwa lombwela oThe Namibian Omaandaxa kutya kapu na omumbwe opo a tote ongudu yopolitika imwe shaashi moshilongo omu na nale eengudu dopolitika di dule 20.

Momudo 2019, Amushelelo okwa li a tota ongudu yoPower , opo a kufe ombinga momahoololo omomudo 2019, opamwe nomunandjungu Evilastus Kaaronda.
“Onda hala ashike ongudu oyo tai dulu okutambula ko omunhu e na omaukwatya a fa ange oukwaita,” Amushelelo osho a ti ngaho.

Amushelelo okwa li a waimina ongudu yoNEFF momudo 2022, nokwa li a hoololwa a ninge komufala wongudu kombinga yemanguluko leliko loshilongo.

Okwa ti ke na nande oupyakadi nokukala oshilyo shoNEFF kwa li shaashi edilaadilo lokukondjela eliko loshilongo olo le mu nana kwa li opo a waimine ongudu.

“Onde lihonga kutya monghalamwenyo ngee ino hala okukala to lili ominwe, lihonga mo sha mu keshe shimwe, onde lihonga shihapu pefimbo opo nda li omukwaita unene ngaa pamhito yange opo eshi kwa li ndi li komufala wokuungaunga nokuyambula po eliko.”

Okwa ti okwa fiya po ongudu oyo i na eedula omulongo shaashi okwa li ya kufwa mo meengudu dopolitika.

“Ngeno okwa li ongudu inai kufwa mo ngeno fiyo opaife inandi fiya po ongudu oyo,” Osho a ti ngaho.

Amushelelo okwa yandja ombedi kelelo longudu yoNEFF eshi ya kufwa mo meengudu dopolotika, unene ngaa omunhu oo ha ningi omatokolo mongudu.

Okwa ti oshinima eshi shokudopa okuyandja olopota yoshimaliwa edopo lewiliko longudu.

Okwa ti oikumungu ohai tonatelwa kewilikongudu.

“Oshinima shiwa osho tashi dulu okuningwa okupula omupelesidente nomupedu pelesidente va yandje ouyelele koshiwana kutya omolwashike va dopa okwoongela eelopota pefimbo,” Osho a ti ngaho.

Eshi a pulwa kutya ongudu okwa li ya pumbwa okuninga shike opo oshinima eshi shiha ningwe, Amushelelo okwa ti oikumungu yoludi eli oya pumbwa omunhu e na owino wa pumbiwa.

“Ongudu okwa li ya pumbwa okuyandja oilonga komunhu e na owino opo a longekide omikanda doshimaliwa odo. Eshi kashi shi oshinima shidjuu, oto kutu ashike ehangano li ninge omavalulo oye ndee to yandje omikanda,” Amushelelo osho a ti ngaho.

Eshi nda uda kutya ongudu otai kufwa mo meengudu dopolitika okwa li da uda nai neenghono, osho a weda po ngaho.
Nande okwa fiya po oNEFF, Amushelelo okwaanya kutya ota xulifa po okulwilafa oikumungu yeliko.

“Keshe kongudu yopolitika ipe oko handi i, ohandi ka twikila nokulwifa emanguluko leliko… oshinima tashi twikile noitashi dulu okweekelwashi,” Osho a ti ngaho.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!

Latest News