Okakomisi kopaliamente ke na sha noinima ya pamba ekotamhango noikwaveta oka shiva Michael Amushelelo koshoongalele shomapulaapulo osho tashi ka kala kopaliamente mEtine.
Oshoongalele otashi ka kundafana kombinga yomukanda oo kwa li a yandja muMarsa u na sha nokuhe na oilonga moshilongo.
Amushelelo omukanda ou okwa li e u yandja mefiku lemanguluko, tau pula opo opaliamente i tote po oshikefa shoshimaliwa shokuyambidida ovanhu ovo vehe na oilonga ngaashi naana osho shovakondjelimanguluko.
“Osha pa ovakondjelimanguluko oufemba wokutyapula nokulya oimaliwa yovafuti voishoshela puhe na ou te va piyaaneke,” Amushelelo osho a ti ngaho.
Natango okwa pula vali kutya konima kwa totwa oshikefa shoshimaliwa shovanhu ovo vehe na oilonga, Ovanamibia aveshe ovo vehe na oilonga opo va kale hava pewa opendjela ya wana okuyambidida eenghalamwenyo davo.
“Ohatu pula kutya konima kwa totwa oshikefa shokuyambidida ovanhu ovo vehe na oilonga, ovanhu aveshe ovo vehe na oilonga nava futwe oshimaliwa shi fike poN$250 000.00 opo va ninge eeproyeka da yooloka odo va hala,” Osho a ti ngaho.
Amushelelo okwa ti, omwaalu wovanhu ve fike pomiliyona oshinghwanyu hamanho ou li moluhepo.
“Otu na Ovanamibia ve fike pomiliyona imwe oshinghwanyu mbali vehe na oilonga, omo vahapu ovalaule ovo tava mono oixuna,” Amushelelo osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
