Amupanda okwa ti okukufwa onyama pOshivelo kashi li pauyuki, inashi yuka

Omuleli wongudu yoAffermative Repositioning Job Amupanda okwa ti oshiningwanima osho omunambelwa wopOshivelo e mu kufa onyama osha kuma efimano lounhu waye.

Okwa li unene a kumwa koshinima eshi shaashi onyama oyo a kufwa oya xwikwa po omanga a tala ko ashike voo novatali vamwe, Amupanda osho a lombwela omhupanguli Shafimana Ueitele momhangu yopombada yaVenduka ngaho Etivali.

Amupanda okwa ti ou oumbangi mokuyambidida oshibofa shaye omo ta pula omufinda utilyana u dje po nomhangu i mone kutya kau li pakotamhango.

Ota pula yoo omhangu opo i yandje elombwelo kepangelo li kufe po omufinda utilyana meendelelo, ile moule womafiku 90.

Amupanda okwa dimbulukwa kutya okwa li ta di komukunda wavo, Omaalala, oo u li konooli yomufinda utilyana, a yuka kOvenduka momafiku 17 Mei 2021 eshi ombelela oyo kwa li a landa pOmuthiya kwa li e i kufwa pOshivelo.

“Eshi kwa li handi di komukunda wetu nda yuka kOvenduka, onda kanghama pomatala opOmuthiya ndi lande onyama, noikulya yopamufyuululwakalo naikwao imwe yomukulukadi wange, ounona nofamili yange,”
Amupanda osho a ti ngaho moumbangihokololo waye.

“Okwa li ndi wete kutya osha pumbiwa molwouteku wange, unene ngaa omahongo ameekulu wange kutya ame ongomulumenhu nomutekuli wofamili yange ondi na oshinakuwanifa shokuya keumbo noinima yonhumba handi i twaalele ofamili.

Okulanda oinima pOmuthiya oshi li yoo shi na ombilixa pakuyelakanifa neendado da londa domOvenduka.”

Ashike nee, ombelela oyo kwa li a landa okwa li ei kufwa peinda lopolifi pOshivelo, shaashi onyama inai pitikwa okukufwa koitopolwa oyo i li konooli yomufinda utilyana okuya koitopolwa imwe yokuumbuwanhu womufinda utilyana waNamibia.

Amupanda okwa ti eshi a pula omunambelewa ou a kufa ko onyama yaye ngee ota dulu okuyandja po onyama oyo kovanhu ovo ve li konooli yomufinda utilyana, omunambelewa okwa ti ina pitikwa okushininga.

“Oshiningwanima eshi osha udifa nge nai nosho yo omulaule keshe, pakushiiva ondjokonona yetu yomahepeko nokatongotongo, ongomudali oo elalakano laye lokuumbata onyama okukapalwifa ofamili yaye,” Osho a yandja oumbangi ngaho.

Amupanda okwa ti: “Okwa li nde liumbatelwa shihe li pauyuki pakuyelakanifa nomunhu ou ta piti pOshivelo tadi koushimba. Ihava hadwa nandenande nokukufwa oinima ngaashi nda ningilwa.

Ngee tava piti omufinda utilyana nonyama itilyana ohaku ti ashike oya yela nale nokai na nande omikifi, ashike shaashi okwa li handi di kOwambo, ombelela oyo kwa li ndi na okwa talika kutya oya kaka noi na omikifi.”

Omufinda utilyana edidiliko lefininIko loukoloni, nonghee nee inau kala tau longifwa muNamibia la manguluka, Amupanda osho a ti ngaho.

Epangelo, minista wounamapya nounaimuna, omeva nomatendululo omadu, omutumbawiliki woimuna nonyama moNamibia, ehangano loinima ya pamba ounamapya nounaimuna laNamibia novanafaalama vakula Diethelm Metzger naAndre Compion otava kondjifa Amupanda.

Momukandaindilo wa yandjwa komhangu, hahende a kalela po epangelo nominista younamapya nounaimuna okwa popila omufinda utilyana kutya owa pumbiwa, ou li pauyuki nomukalo uwa wokukelela omikifi doimuna ngaashi omukifi wekondo nelaka di haandjakane okudja konooli yaNamibia okuya koitopolwa yokuumbuwanhu womufinda utilyana.