Amupanda ‘okwa sheka’ omupedu ministanefano komalungula

Efano olo omuleli wongudu yoAffirmative Repositioning Job Amupanda kwa li a tula komalungula muJuli 2021 ola sheka omupedu minista woimaliwa Maureen Hinda.

Amupanda natango okwa weda ko vali koweehame oo a etela Hinda konima eshi a landulifa ko omapopyo komalungula eshi kwa li Hinda e mu tulila mo oshibofa shokukakeka oukwatya waye, omhupanguli tavatele Colins Parker osho a mona mepangulo laye olo kwa li la ningwa momhangu yopombada mOvenduka Etitatu.

Parker okwa ti efano olo kwa li la tulikwa koFacebook kuAmupanda nosho yo omapopyo oo a ninga komalungula muJanuali momudo 2022, konima oikundaneki kwa li ya lopota kutya Hinda okwa li te mu futifa oshimaliwa shi fike pomiliyona imwe, okwa li taanyateke oukwatya waye nokwa pula Amupanda a fute Hinda oshimaliwa shi fike poN$100 000.

Parker natango okwa pula Amupanda a fute oimaliwa yovakalelipo vopaveta vaHinda oyo a longifa moshibofa osho e mu tulila mo nokwa ti vali na yandje oishoshela ya wedwa po i fike peepelesenda 20 keshe kodula doshimaliwa shi fike poN$100 000 osho tashi pewa Hinda, fiyo omwaalu aushe oo wa futwa.

Amupanda Etitatu okwa ti oku na tete okukundafana nahaende waye omanga ina ninga etokolo ngee ota ningi etalululoindilo li li ominge netokolo eli.

Nande Amupanda pexulilo lepangulo laParker ka li a findana moshibofa shaHinda osho kwa li e mu tulila mo, omhupanguli natango okwa li a mona kutya omapopyo aAmupanda amwe oo Hinda a nyenyeta kakwa li nande taa kakeke edina laye.

Hinda okwa ti kutya Amupanda okwa li a tula efano lomukainhu omunyasha a dja omakende omutenya nokwa ninga edidiliko nomunwe waye koFacebook muJuli momudo 2021, nomushangwa: “Omupedu minista woimaliwa Maureen Hinda pefimbo lekondjelo manguluko. Maureen okwa li a WizWiz. Okwa fa ite lipula luvali okukufa mo ombele!”

Amupanda okwa ti, nande ongaho, omapopyo oo okwa tameka noshitya “Otashi monika sha fa omupedu minista woimaliwa Maureen Hinda” omanga oitya ikwao inai landula ko.

Hinda okwa ti Amupanda okwa li a hala okutya omukainhu oo e li mefano okwa li efano laye pefimbo lounyasha, okwa li “okakadona komolukanda ke lilongekida okulwa keshe efimbo”, ota monika “e na oukwatya wOvadamara ita tila okutwa omunhu nombele”, ine “lixwa po nokwanyika oshiponga nota dulu okulemaneka keshe umwe” nokwa li “omukainhu ehe na omikalo pefimbo lekondjelo manguluko”.

Enyateko loukwatya olo Hinda ta ti oli li momapopyo aAmupanda okwa li inali yela nawa, Parker osho a mona ngaho.

Okwa ti yee eshi eshi wete, momushangwa oo Amupanda kwa li a tula pefano okwa li ashike mu na oshinima shimwe osho tashi monika sha nyika oshiponga.

Efano nande ongaho, kakwa li efano loshili laHinda okwa li ashike okafeekela naAmupanda okwa li e shi shi nawa osho, Parker osho a ti ngaho, omanga ina mona kutya Amupanda okwa li ashike a longifa efano olo mokusheka Hinda.

Okwa ti vali kakwa li pu na oshinima sha kwatela mo ouwa woshiwana nonghee nee kapu nande osho sha kufwa momishangwa odo di li pefano koshiwana.

Hinda natango okwa ti Amupanda okwe mu popila oinima yakaka muJanuali momudo 2022, eshi kwa li a popya komalungula kutya okwe mu tulila mo ashike oshibofa shaashi “Aanya oshuuka okudja kumeme” naashi a tya “omatondo ovanhu vokoNehale itaa landifa” [sic]
Omapopyo oo, Hinda okwa ti, okwa li a nuninwa okunyonauna ondjokonona yaye nokwa li a udika ko koshiwana kutya okwa hala okutya “yee omukainhu wedula dopokati noku na ohokwe mounona voumati”, otashi ulike sha nyika onghone note mu futifa shaashi vati okwe mwaanya.

Momapopyo ahapu Hinda oo ta ti otaa kakeke edina ile oukwatya omo Hinda kwa li a hala okukufwa mo muwo oo a dja kuAmupanda okwa li taa monika ehe na ongushu nawa, Parker osho a ti ngaho.

Ashike nee, osho sha popiwa kuAmupanda kutya okwa li a handuka nokwakwata onghone shaashi okwaanya omalombwelo aye opaihole eshi kwa li e li natango oshilyo shoSwapo kakwa li nande e na oumbangi wa wana nokwa li lela taa kakeke oukwatya nedina laye, Parker osho a mona ngaho.

Haende Doris Hans-Kaumbi okwa li a kalela po Hinda.

Amupanda okwa li a kalelwa po kuKadhila Amoomo.