Osho sha pulwa komuleli wongudu yoAffirmative Repositioning (AR) Job Amupanda opo eedula dokuhoolola di kale okudja po16 ngee ongudu yaye oya findana omahoololo oo twa teelela osha tambulwa ko kovandjadjukununi vamwe.
Amupanda okwa li a holola oshinima eshi Etivali pefimbo opo kwa li ta popi novayambididi vongudu.
“Peedula 16, tadi ifanwa ‘eedula dediminino’ okaana otaka dulu okuya poixulo, taka ningi eteelelo ndee taka ningi omudali. Odula ya shikula ko, po17, otava dulu okuya koshoongalele shovadali kofikola,” Osho a ti ngaho.
Okwa ti ounona ohava dulu okumona omaufemba oshiwana ndee tava toto eembanga po16 ndee tava i koiputudilo yopombada ndee “tava kala kuvoovene” konima yaasho.
Omundjadjukununi woikwapolitika Ndumba Kamwanyah okwa ti osho oAR tai pula otashi dulu okunghonopaleka ovanyasha nokukwashilipaleka kutya omawi avo okwa udika.
“Eshi a denga omufindo koinakuwanifa nomaufemba oo ve na nale peedula 16-17, Amupanda okwa popya oshitwa shiwa tashi popile oufemba wokuhoolola peedula edi,” Osho a ti ngaho.
OMALIPULO
Kamwanyah okwa ti ngaha, ashike nee, oku na omalipulo ngee ounona ava ove lilongekida ngaa novakula ngaa nokukufa ombinga momahoololo nokuninga omatokolo opamufika.
Natango, omundjadjukununi woikwapolitika Ben Mulongeni okwa pula ngee omunhu e na eedula 16 ota dulu ngaa okuninga omatokolo.
“Ito dulu okupulwa opo u ninge omatokolo omanga ashike opo to ya moukulunhu,” Osho a ti ngaho.
Peedula 16, ounona natango otava danauka ashike neudeko lishona “nghee onghalamwenyo i na okukala,” Osho a ti ngaho.
“Ounona otava dulu okudanauka neyoka opo va tale ngee ohali lumata ngaa shili. Onda itavele kutya natu tameke tete neenghundafana, ndee hatu udu ko kutya omolwashike kwa li kwa tokolwa eedula di tameke po18 ndee hatu tale ngee ohatu shi lundulula. Kashi shi oshinima shokutokolwa komunhu umwe,” Osho a ti ngaho.
Omundjadjukununi woikwapolitika Johannes Coetzee okwa ti omunhu ou ta pula oshinima eshi otashi dulika ina tala nawa omwaalu wovanafikola veedula 16 ovo hava dulu okuninga omatokolo opamufika.
“Ounona veedula 16 otashi dulika vehe na nawa omauyelele neendunge dokutongola omauyelele kombinga yopolitika opo va dule okuninga omatokolo opamufika, okuyelekanifa naavo ve na eedula 18 ile di dulife po,” Osho a ti ngaho.
Okwa ti momudo 2023 eepelesenda 75 dounona vondodo 11 kakwa li tava dulu okuya kondodo 12 ile koiputudilo yopombada.
Coetzee okwa ti omwaalu uhapu wounona ve li peedula 16 ou li metonatelo lovadali vavo nokave na eendunge dokuninga omatokolo opamufika natango.
“Oshinima osho otashi dulika shi ete ounona veedula 16 va kale pomaumbo avo opo va hoolole she likolelela komahalo ovadali vavo opolitika,” Osho a ti ngaho.
Natango, Kamwanyah okwa ti okutala ashike movanyasha otashi dulika kupe oAR ovahoololi va pama.
“Okweefa ovanhu veedula dikwao otashi dulika omukalo wa puka,” Osho a ti ngaho.
Kamwanyah okwa ti oAR otai dulu okuliyambula po ndee tai ningi ongudu oyo ya tala koikumungu oyo ya kuma oshiwana ashishe omanga tai longifa omukalo wovanyasha wa pama.
Okwa ti eshi oAR ya kwatelwa komesho kuAmupanda oshili omhito iwa.
“Ngee ongudu oya kala ya talika ko kutya oyo munhu ashike umwe, oye lietela oupyakadi wokukala inai tali ka ko nawa, unene ngaa ngee opa holoka sha puAmupanda ile ngee efimano laye ola kana po,” Osho a ti ngao.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
