Amunyela ta ti ota kuthwa epya lye ku Kapatashu

OMUKALIMO gwomomukunda Onangombe mOshitayi mOndonga, David Nangolo Amunyela, ota ti kutya ota kuthwa epya lye negumbo lye limwe li li momukunda Omutsegwondjamba gu li popepi nOmutsegwonime muuzilo wOndonga mOshitopolwa sha Shikoto.

Tate Amunyela, ngoka e na oomvula omilongoheyali nayimwe, ta ti kutya epya lye ndyoka lyokOmutsegwondjamba, aniwa ote li kuthwa li pewe po , Fillemon Kambala, ngoka a li omukalelipo gwa Namibia ko Nigeria nangashingeyi okwa kalelapo oshilongo ko South Africa, ngoka kuyele nuumvo aniwa a langekwa mwene gwomukunda ngoka Omutsegwondjamba kElelo lyOndongaAmunyela ta ti, etokolo lya tya ngawo lyokugandja po epya lye, ine shi lombwelwa kwali, okwe ke shi itsa ashike, mu Desemba omvula ya zi ko. Ta ti mu Desemba moka, omvula ya zi ko, pamwe naanegumbo lye, oya yi kegumbo lyawo ndyoka lyokOmutsegwondjamba, ya ka lime, ngashi ngaa haye shi ningi kwali noshito. Sho ye ya pegumbo mpoka, oya adha iiti yegumbo lyawo ya dhikulwa mo ye ekelwahi mepya moka nokandunda kawo kIipeleki nako ka panagulwa po, yo iinima ye ngashi omakumbatha, oombasikela dhe mbali, oshuta ye, oonguyo dhe niinima iikwawo ya kuthwa mo nenge ya yakwa mo. Sho aniwa a kala ta pulaapula, okwa uvu kutya omuyonena aguhe ngoka ogwa ningwa mewiliko lya Kapatashu komukunda gwawo, tate Job Shangadi, molwashoka epya lye ndyoka olya pewa po omusamane Kambala. Amunyela ota ti okuza mpoka, okwa yi kumwene gwOshikandjo Elenga enene, tatekulu Andreas Uukule, ngoka sho e mu pula kutya olye a gandja po ehala lye, e mu lombwele kutya ye haye e shi ninga, shapo Okapatashu kawo ,Shangadi. Elenga aniwa olye mu lombwele wo kutya Omukunda gwawo Omutsegwondjamba, ngoka gwa li hagu lelwa kwali ku nakusa, Kleopas Nashikaku, ngashiingeyi ogwa langekwa omusamane, Fillemon Kambala. Elenga enene tatekulu Uukule, tali lombwele Amunyela kutya lyo olya gwanitha po ashike etokolo lyElelo lyOndonga kutya omusamane Kambala a langekwe mwene gwomukunda mOmutsegwondjamba, ihe ha ye a tokola kutya omusamane Kambala a kuthe po epya lye. Elenga enene tali lombwele aniwa Amunyela, a ye ku Shangadi ye mwene e ke mu pule oshinima shoka. Amunyela, ota lombwele The Namibian kutya, a li nee kukondja ya monathane na tate Shangadi, oye ngaa ke wete ngoka. Sho aniwa te mu dhengele, ongodhi ye ote yi pata.Okuza mpoka, Amunyela ta ti, okwa yi kOpolisi ya Shivelo noku yi lopotela kutya iiti yegumbo lye oya dhikulwa mo, ondunda ye yiipeleki oya hanagulwa po mewiliko lya kapatashu kawo tate Shangadi.Komanda yOpolisi ya Shivelo, Inspecta Bernard Nguulivali, kepulo, okwa koleka kutya omusamane Amunyela, okwe yile ko shili kOpolisi kOshivelo, ta hepulula oshinima shoka, ashike sigo oompaka ina tulila mo omuntu oshipotha kwali. ‘ Shapo opo ngaa te ya e shi ninge,’ Inspecta Nghuulivali ta ti ngawo.Mokumonathana nomusamane Shangadi, pangodhi, okwa lombwele The Namibian kutya, shoka tashi popiwa ku Amunyela kutya oye a gandja po ehala lye ku Kambala kashi shi shoshili. ‘ Nge okwa hala uuyelele na ka pule kElelo lyOndonga shapo. Ngaye kandi na mo sha megandjopo lyehala lye. Ngaye omutumwa ashike gwElelo ngashi nda kala nale,’ Shangadi ta ti ngawo nokugwedha po ta gandja uusama komusamane Amunyela kutya ehala ndyoka ta ti olye, okwa kala ethimbo ele e li etha po, naantu oya kala taya ti kutya ine li hala we. Tashi vulika nElelo pokugandja po ehala lye ndika, lya kala lyi ikwatelela kwaashoka. Shangadi ta ti wo kutya, ye onga Kapatashu momukunda ngoka ethimbo ele, okwa kala a koneka kutya, Amunyela ka futa ehala lye, ngashi sha tegelelwa. Ha pititha po ethimbo ele, ke li po pepya lye mpoka nokukala wo ina futa iifendela yepya lye ethimbo ele. Shangadi ta ti ngashi okuza momumvo 1987 sigo 1989, ina enda ko kepya lye hoka, ye wo ina futa sha pokati mpoka. Ta ti mo 1997, okwa futile ko nee OoN$2.40 ndele opuwo, omanga okuza momumvo 1999 ina futa ko we sha kepya lye ye ina lima mo.’ Ohe ya mo ashike ta langeke mo aantu nokuya. Amunyela, omapopyo agehe ngaka ga, Shangadi, okwe ga ekelahi kokule. Ta ti Shangadi ota fundju, molwashoka ye hela a kala oha futu iifendela yepya lye ndyoka. Ta ti aluhe sho ta futu iimaliwa yepya lye ku ye, ke mu pa okambapila kasha, kokuulika kutya okwa futa. Kepulo, amushanga gwElelo lyOndonga , Joseph Asino, okwa koleka kutya opu na shili oshinima shatya ngawo she yile mElelo lyOndonga, nElelo lyOndonga olye shi shunitha kEwiliko lyOshikandjo shoka, ano kElenga enene, Andreas Uukule, ye ke shi kundathane mo nawa nokuninga etokolo.