Amerika a kwathela oonakuhepekwa komeya

EPANGELO lyAamerika olya gandja oshimaliwa shOondola dha Namibia oomiliYuna ntano oshinkwanu omugoyi (N$5,9 million) ku Namibia, shokukwathela aantu mboka ya hepekwa komeya gefundja moshilongo.

Aanamibia kumwe ayehe ye li 350 000 oya gumwa kefundja moiitopolwa yokOnooli yopokati, mo Caprivi nomOkavango.
Aantu taku tengenekwa ye li 13 000 oya thigi po omagumbo gawo omanga ya konda po 9 000 ye li hayi zi mOosenda dhoonakuhepekwa komeya.
Oshimaliwa shika Amerika okwe shi gandja mOmaandaha goshiwike shika, okupitila mOmbelewa yAamerika yOmakwathelo gOpaulumompumbwe gOpondje/Office of Foreign Disaster Assistance (OFDA), sha pewa ehangano lya Unicef nehangano lyOmahangano gOmushigakano Omutiligane/International Federation of the Red Cross (IFRC), Omugandjimulombo gwOmbelewa yOmukalelipo yAmerika mu Namibia, Ray Castillo, osho a popi ngaaka.
IFRC ota mono Oondola dha Amerika omayuvi omathele gatatu, tashi ka longithwa mokumonena aantu mbaka omahala gokukala nokuya landela iikulya.
Unicef ota mono osOondola dhAamerika omayuvi omathele gatatu nomilongo ntango, tashi ka longithwa mokugandja omeya gokunwa ga yela, uundjugo nomokweeta poi oproyeka yuukoshoko.
Omwedhi gwa zi ko, Iigwanahangano nomahangano galwe omagandjimakwathelo gopaulumompubwe, oya li ya gandja oshimaliwa shOondola dhAmerika omayuvi omilongo ntano kehangano lyOmushigakano Omutiligana mu Namibia, li monene aantu mbaka nootenda, omakwathelo gopaunamiti, nuumbauto.
Shika osha li nee sha eta oshimaliwa shoka Amerika a gandja nuumvo kaantu mboka ya hepekwa komeya gefundja, pOondola dhAamerika omayuvi omathele gaheyali. Momumvo 2003, Amerika okwa li wo a gandja omakwathelo kaantu mboka ya li ya gumwa kefundja moshitopolwa sha Caprivi nosho wo ku mboka ya li ya dhengwa ku ndyoka lyomumvo gwa zi ko mOonooli yopokati.
Otaku popuwa kutya omeya miishana yomulonga gwa Zambezi oga ya pombanda noosentimeta 0.98 mOmaandaha pontapa ya Bukalo omanga omeya mEtale lya Liambezi popei na Muyako ga londo noosentimeta dhi li pokati ko 13 mOlyomakaya nOmaandaha.
Ihe pokati kOsoondaha nOmaandaha, omeya momulonga gwa Zambezi oga yi pevi noosentimeta ne. Omukuluntutseyinawa miikwameya, Guido van Langenhov, ngoka pethimbo ndika e li moshitopolwa sha Caprivi – okwa ti omeya ogendji oge li taga zi miishana oge li taga tsikile nokwiidhenga momomulonga gwa Chobe nosho wo pontopa ya Bukalo.
Omasiku g zi ko, Ombelewa yIigwanahangano yokuninga omakwatathano ge na sha nomakwatghelo gaantu gopaulumompumwe/UN Office for the Co-ordination of Humanitarians Affairs (OCHA), oya li yi uuyuni u gandje oshimaliwa shOondola dha Namibia oomiliyuna omilongo mbali na hamano oshinkwanu heyali, shokukwathela Namibia mboka ya mona iihuna komeya gefundja miitopolwa yokOnooli yopokati nOnooli-uzilo.
OCHA okwa ti nonande ina ku monika eyo pombanda lyoshimela nomikidhi hadhi zi momeya ngasha Okolera, oku niwe uumbanda kutya otadhi ka holoka po omolu oondama dhomeya gohanya dhoka tadhi vuluka.
Omupresidende Hifikepunye Pohamba okwa li a tseyitha kutya uupyakadhi wefundja mOnooli yopokati nomOnooli-uzilo, ou li oshiponga oshinene shopashigwana shoka sha pumbwa omakwathelo gopaulumompumbwe.