Ambrosius La Chox a fumvikwa pAnamulenge

OMULONGISIKOLA,ye wo omuhikingalo, Ambrosius Tangeni Kanyangela, a tseyika nawa nedhina La-Chox, ngoka a manene oondjenda dhe mOshipangelo sha Shiwakopo meti 9 Septemba 2009, okwa fumvikwa poAnamulenge okuzilila megumbo lya hekulu, Sergius Kanyangela mOupembe mOmbalantu moMusati.

Oshituthifumviko she osha li sha kalwa ku tate gwe Gervatius Kanyangela, meme gwe Genorosa Andowa, uunona we uyali, kElenga enene lya Mbalantu tatekulu Oswin Mukulu nomalenga ge gamwe gootate Petrus Aipanda nosho tuu, kAaleli yOpambepo taya kwatelwa komeho kOmudiakoni Ambrosius Shalumbu ngoka e li mbushe ya nakusa La Chox, aalongisikola, mwa kwatelwa naamboka yokOsikola Atlantic Family Primary School yokOshiwakopo hoka a li ta longele,taya kwatelwa komeho ku meme Emma Iipinge.Mokugandja ondjokonona ya nakusa La Chox, Norbert Aikela, okwa ti nakusa La Chox, okwa valelwa mOshikulufitu eti 11 Juli 1978. Omolwiita yEkondjelomanguluko, tate gwe Gervatius Kanyangela na meme gwe Genorosa Andowa, oya thigi po oshilongo nokuya pondje. La Chox, okwa yi a ka kale koohekulu, Sergius Kanyangela kOupembe kOmbalantu hoka a kokele. Manga e li hoka okwa tameke Osikol,a ye yaanona poAnamulenge noshowo pOkavu. Okuza mpoka okwa ka tsikila Osikola ye yOseko yOpombanda koDobra hoka a manene Ograde 12. . Ta yi ko Politechnica kOsikola yUuwindjinia ngeno, ashike ine ke yi mana. Okwa yi kOkolligi yUulongi ya Venduka hoka a kiilonga uulongisikola noku wu mana momumvo 2000, te ya ta longo osikola poKelemba Combined School moMusati, okwa thigi po osikola ndjoka nokwa ndjoina Eithano lyUuhikingalo, ano lyOomusika. Ta kala nee ta shanga oongalo nokwiimba. Momumvo 2005, okwa pititha Oalbum ye yotango yedhina Mr Barman ndjoka ye mu winitha noku; li Ekopi lyo NBC Sanlam Music Award, Okangalo ke ‘Sexy Girl’. Momumvo 2003,manga ta hiki oongalo ngawo, okwa shuna ishewe keithano lye lyUulongi momumvo 2007 nokwa ka longa ko Ella du Plessis kOvenduka nomomumvo 2008 okwa yi a ka longe osikola ko Atlantic Family Primary School hoka nee a kala sigo okusa kwe. mOmumvo nguka La Chox okwa pititha Oalbum ye ontiyali yedhina Macho man, moka mu yo a li ehole mo okangalo kedhina ‘Love Story’. Sho a si ngeyi, okwa adhika i ipyakidhila no Album ontintatu, yadhika nokuli ya kwatitha okangalo kedhina ‘Lost and Found’.Mo Album ye ontiyali okwa imba mo okangalo taka ti, ‘Nge nda si, yamwameme inamu lila’. Ondjokonona ta yi ti, Tangeni okwa li omumweni, ashike okwa li ha lesha omadhilaadhilo gomuntu nuupu. Meme Emma Iipinge ngoka wo a popi pehala lyosikola yawo ya Atlantic Family kOshiwakopo, okwa ti oya kanitha omulongisikola omunandunge.