Amakali a fumvikwa pOniipa kengathithi lyaalilasa

NAKUSA tatekulu Tonata Johannes Amakali elenga enene lyOshikandjo shUulenga sha Ndangwa mOndonga tatekulu Johannes Amnakali, ngoka a manene oondjenda dhe mOshipangelo sha Venduka meti 12 Desemba 2008 konima sho a li moshiponga shohauto, shoka sha ningilwe lwopOnathinge mOndonga mOshitopolwa sha Shikoto ongula onene yeti 2 Novemba 2008, okwa fumvikwa pOniipa okuzilila mOngeleka yawo ya Niipa mOlyomakaya ngaka ga zi ko kengathithi enene lyaalilasa.

Oshituthifumviko she shika osha li sha kalwa kOmalenga omanene nomashona gOndonga taga kwatelwa komeho kOmunashipundi gwElelo lyOndonga Elenga enene tatekulu Petrus Kauluma noku Amushanga gwElerlo lyOndonga tate Josef Asino, kOministeli yOpevi Henock yaKasita, Gavena yOshitopolwa sha Shana omusamane Klemens Kashuupulwa, kAawiliki yOpambepo, kAanangeshefa, kAanafaalama, kAanambelewa yEpangelo naamboka yOmahangano ga yama kEpangelo naangoka gaashi gOpapangelo noshowo nee koshigwana oshindji shaalilasa.
Omupresidende gwopevi gwo DTA tate Phillemon Moongo, ngoka e li gumwe gwomooyene yomikunda moshikandjo sha Ndangwa, naye opo a li nosho wo gumwe gwomAawiliki yo RDP, omusamane Jesaya Nyamu.
Omusita S. Ekandjo nOmusita S. Iitula oyo ya kwatele komeho nOmagalikano. Omusita S. Iitula ta ningi euvitho mesiku ndyoka lyefumviko mOngeleka ya Niipa.Ondjokonona ya nakusa tatekulu Amakali oya ningwa ku Amushanga gwElelo tate Josef Asino, Ndjoka yIilonga mElelo oya etwa po kElenga enene tatekulu Fillipus Uukule.
gavena ya Shana tate Kashuupulwa okwa eta po Oshipopiwa shOmahekeleko sha zi kOmupresidende Hifikepunye Pohamba. Elenga enene tate Vilho Kamanya ngoka ye nElenga enene tatekulu Boas Mwendeleli, ya li taya wilike Oshituthifumviko shElenga ekwawo, okwa popi nkene nakusa Amakali a li ha kwathele aakondjelimanguluko manga a li Amushanga mOmbelewa yOshilongo shOnonga, shoka sha li she mu kwatitha po nokuli kEpangelo lyOmukoloni noku ka edhililwa kOsire uule wethimbo. Ewi lyOmukwaniilwa gwoOndonga tatekulu Immanuel Kauluma Elifas olya etwa po ku Amushanga gwElelo lyOndonga atte Josef Asino.
Omukwaniilwa ye mwene ina vula okukala poshituthifumviko shElenga lye ndika Amakali molwashoka okwa adhika naye a mona po uudhigu weso lyoshilyo mEzimo lyUukwaniilwa wOndonga. Okwa li ashike pOshituthidhimbuluko shElenga lye ndika,Amakali mEtitano poshigumbo pOnatsi.
Pethimbo ta gandja ondjokonona ya nakusa Amakali, tate Asino okwa ti kutya nakusa Amakali okwa valelwa momukunda Oniihandi mOndonga mEgongalo Oniipa momumvo 1940. A valwa ku Nambahu Josef Amakali na meme Namutenya Eva lyaJoel yakaye kaNambahu. A lukwa Tonata, nokwa ka shashwa nee Tonata Johannes. Osikola yEputuko okwe yi hita pOniipa. Tayi kOsikola yaamati kEngela nokuya kOseminali kOngwediva, kUulongi.
Sho a piti uulongi okwa ka longa kOkaku nokOniipa. Okwa longa mOholoseila ya Ndjondjo, mOsitola yOmambo pOniipa, ta kala Amushanga gwoshilongo shOndongo nogwOmukwaniilwa Shuumbwa Filemon Elifas.
Ta longo wo mOombelewa dha Ndangwa. Okwa li mongundu byAagundjuka mEgongalo lyawo Oniipa. Sh a koko ta hokana omukadhona gwe meme Kaino Nelago Sostenus momumvo 1968 mOniipa.
Mondjokana yawo taya mono mo omagano ganaona yatatu. Aamati yaali nomukadhona gumwe ngoka e ya tetekela nale.Mbaka oye na aamwahe yatano. Tashi ti aavalwa ayehe kumwe oya li yahetatu nopu na ngashiingeyi ano aanona yaheyali. Meme Kaino naye okwe ya tetekela nale kwali momumvo 2006.
Nakusa Amakali okwa li a lengwa kOmukwaniilwa Shuumbwa nokwe mu pe omukunda Onantsi. Konima yeso mlyomusamane gwaPale, nakusa Amakali okwa ningwa Elenga enene lyoshikandjo shoka sha Pale kOmukwanillwa tatekulu immanuel Kauluma Elifas. Pethimbo e li Amushanga gwElelo lyOshilongo shOndonga, Amakali, okwa li Omukwatakanithi omunene gwAakondjelimanguluko nOmukwaniilwa gwOndonga.Pokati mpoka, sho Elenga enene lyOshikandjo shUulenga sha Ndangwa tatekulu Johannes Mbokoma a mana oondjenda dhe, nakusa tatekulu Johannes Amakali, ngoka a kala e na uukwatya wu na elelo, eputudho, elongo, omuguni, omupukululi, omwiifipipiki, omwiidhidhimiki, omunambili, momugandji ihaa yawala ta pu pu, ite ku ethele ondjala, iha ndlapatele she, omugandjimayele omwaan awa, omukwatakanithi gwaantu, omunyanyukwi, omunamashendjo, omunandjungu miilonga nomuyolithi wo,okwa langekwa Elenga enene lyoshikandjo shUulenga shoka sha Ndangwa.
Moshipopiwa she Omukwaniilwa tatekulu Kauluma Elifas, okwa ti kutya omumvo 2008 itagu ka dhimbiwa nuupu kuye, kElelo lyondonga nokoshigwana ashihe, shaashi ogwa ya nookuume oyendji, aanona naakuluntu moka nee mwa kwatelwa omumati gwe Elenga lye Johannes Amakali, ngoka a kala a pyokoka miiloonga ye mElelo lyOndonga.
Omukwaniilwa ta ti Amakali okwa kala a simanekwa koyendji omolu eyakulo nelelo lye lyombili. A gwanitha po oshilonga kehe te shi pewa noku shi longa nohokwe, neitulomo, nondjungu, neifupipiko, nomukumo, ta longo lela, omumati lela gwomOmbala. ‘Amakali okwa li Omuyapostoli gwOmbili nomukwatakanithi gwaayehe. Onkee pehala lyEleloo lyondonga , lyandje mwene nolyaaleli ayehe yopamuthigululwakalo mONamibia mono ndi li Omunashipundi, otandi ti ezimo, oluvalo oshikandjo noshigwana ashihe natu hekelekweni,’tatekulu Omukwanilwa gwOndonga tatekulu Kauluma Elifas ta ti ngawo.