Alweendo oye omuwiliki gwo NPC

OMUPERESIDENDE Hifikepunye Pohamba okwa ulike Tom Alweendo omuwiliki omupe gwoKommissi yomathaneko gopashigwana[NPC].
Alweendo ngoka a kala oomvula odhindji oye omuwiliki nenge gavena gwoMbaanga onene yaNamibia okwa pewa iilonga mbika iipe metine.

Omuperesidende okwa shuna ishewe omuwiliki gwiilonga yomonanguwi pehala lye uule woomvula ntano. Leitenanda Ndjayi, Lucas Hangula okwa kolekwa natango a tsikile niilonga yokuwilika oshikondo shika.Omasiku gapiti opwa kala tapa popiwa kutya Alweendo okwa dhengelwa ongodhi komutse gwoshilongo opo a ye kegumbo lyepangelo, na aniwa poshigongi shoka omuperesidende okwa tseyithile Alweendo kutya okwa hala oku mu pa iilonga yokuwilika ongundu yomathaneko gopashigwana.Alweendo na Hangula kaya lipo pethimbo lyokabinete taka ulikwa.Mosoondaha, Pohamba okwa tile omahala ngoka gaali otaga ka tulwa aaniilonga nale.’Onda ulike Tom Alweendo ongo omuwiliki gwo NPC na Leitenanda Ndjayi, Lucas Hangula ongo natango omuwiliki gwiilonga yomonanguwi[NCIS],omuperesidende osho a ti.’’Molwaashoka, Alweendo ngashingeyi okwa li ogavena yoMbaanga ya Namibia, Ipumbu Shiimi okwa ulikwa opo a pingenepo Alweendo mewiliko lyombaanga ndjoka,’ osho a gwedha ko.Shiimi ka li po pethimbo ta pewa oshilonga shika pegumbo lyepangelo. Alweendo okwa longela Ombaanga ya Namibia okuza 1997 noshikako she shiilonga oshali tashi hulile omumvo ta gu ya.Leitenanda Ndjayi, Lucas Hangula okwa ulikilwe ku Pohamba mo 2005 ongo omutse gwo NCIS. Omanga inaa pewa iilonga mbika okwa li omutaleli omukuluntu gwopolisi ya Namibia uule woomvula omulongo.Okommissi yomathaneko gopashigwana oya wilikwa kaawiliki oyendji okuza mo 1990. Omuwiliki gwotango okwa li omundohotola, Zed Ngavirue, a landulwa ku Saara Kuugongelwa-Amadhila okuza 1995- 2003, nguka okwa kalandulwa ku Immanuel Ngatjizeko.Momumvo 2005 Helmuth Angula okwa ulikwa omuwiliki gwokommissi ndjika sigo omu Apilili 2008, sho omuprofesor Peter Katjavivi a ulikwa a ninge omuwiliki gwokommissi. Okuza metitano lyazileko omusamane Katjavivi okwa ningi oshilyo shoparliamende.