Alweendo Natangwe a tetwa nekatana komukwashigwana eta dhengwa kOpolisi

OMUMATI omugundjuka gwomomukunda Olusati mUukolonkadhi mOshitopolwa sha Musati, Alweendo Natangwe gwoomvula 26 omasiku ga zi ko okwa tetwa nekatana komukwashigwana gumwe nashi a yi kOpolisi a ka lopote, Opolisi aniwa oye mu pilukile po noku mu dhenga nayi komutse.

Natangwe ota hokololele Oshifo shika kutya esiku ndyoka okwe ya moshilando sha Nesi pondunda yedhina Super Star mpoka a adha yamwe yomookuume ke nokukala mpoka taya popi iinima yawo. Manga ye li mpoka, opwe ya omumati kaye mu shi. Ta pula yakwawo ngele oye mu shi. Yo otaya ti kutya kaye mu shi. Omumati ngoka aniwa okwa pula Natangwe kutya ote mu pulile shike. Oya tameke nee taya nyenyeta molwomapulo ngoka. Natangwe ta ti omumati okwa kutha oshiti, ye Natangwe ta kutha ekende lyombiila ndyoka a adhika ta nu.Omumati okwa fadhuka po. Konima yokathimbo, Tangeni okwa yi pondje a katalaleke. Manga ta talaleke, a ka legaalege, omumati ngwiyaka ya li taya nyenyeta naye oye nguka e na ekatana nokwa tameke te mu dhenge nalyo manga nokonima okwe mu tete kokooko. Omumati ngoka okwa fadhuka po. Natangwe ota ti okuza mpoka okwa yi kOsasiona yOpolisi pOnesi mpoka. Sho ngaa a yi mOpolisi moka, omo a adha omumati ngoka. Tangeni ota ti okwa kutha oshikombe, ngeno e mu dhenge, ashike gumwe gwomAapolisi mOsasiona moka, ngoka Natangwe a ti kutya oye aniwa, Indji, okwa tameke te mu dhenge, ano ta dhenge Natangwe komutse noku mu ehameka unene. Omupolisi nguka a gwedha kiilalo yekatana. Opolisi tayi ti aniwa kutya Natangwe ombudhi na okwa ila shike kOpolisi. Omupolisi ngoka, Natangwe ta ti, okwa li a hala e mu tule miiketanga, ngeno ashike manga e lipo ku shi ninga, yaandja Tangeni yamwe,mboka ya uvu oshiningwanima shika, oye ya pOsasiona mpoka nokupula shoka sha adha omumati gwawo. Omupolisi ngoka okwa holeke po iiketanga ye mbika nokwa mwena. Okuza mpoka aniwa Opolisi oya ti ashike Natangwe naye noyaandjawo.Oya yi nokwa falwa kOshipangelo hoka a ka mona epango.Natangwe ota pula nee ta ti; ‘Omolwashike shi li ngawo. Nde ya okukonga egameno sho nda tetwa nekatana ngeyi, nde ya okulopota kOpolisi, kegameno, ndele egameno otali dhenge ndje ishewe? Oshinima shika shokudhengwa kOpolisi, kegameno oshuuvitha ndje nayi unene shi vulithe pwaangoka a teta ndje nekatana. Ngele nani onda yona, omolwashike ndi na okudhengwa kOpolisi?Omolwashike ndi na okudhengwa , kwaamboka ye na okugamena ndje? Natangwe ta ti ngawo nokugwedha po kutya hasho nande a li a tegelela a ningilwe ngawo kOpolisi. Gumwe gwomaamwayina ya Natangwe, ota ti kutya meme gwa Natangwe, Ottilie Naambo nofamili yawo ayehe oya uvithwa nayi koshiningwanima shika, ano keteto nekatana nedhengo lya Natangwe kOpolisi, nashi wo ina mona we eyakulo kOpolisi hoka a li a ya a ka lopote ngeno, ihe oye a ningi omukolokoshi nokudhengwa kOpolisi. pEthimbo oshinyolwa shika tashi yi komanyanyangidho, inatu vula okumonathana nOpolisi ya Nesi nenge na Komanda gwOpolisi mOshitopolwa sha Musati ye tu pe okomenda yawo moshinima shika.