Africa na longele kumwe miikwamalusheno

OLUSHENO na lu topolelathanwe muAfrica alihe,opo enenevi ndika omathimbo gamwe ha ku tiwa olya hepa li vule oku ngambeka uupyakadhi wokwaana olusheno.

Okwaana lusheno oha ku kotha omahupilo gAfrica iimaliwa oyindji, omukuluntu gwiikwankondo mehangano lyUukumwe wAfrica a ti ngaaka.Ompumbwe yolusheno muAfrica oha yi monika olundji no pomathimbo gamwe oha yi edhile omipepo dhokuhambula miilongo mbyoka, nosho ngeyi ta shi nayipike omapungulo nehumokomeho nonando enenevi olya kuutumba kuuyamba waashi kutumbulwa.Africa oku na oonte dhetango itaadhi pewathana, oonkondo dhomeya kamana, omahooli ito pula, omuku kaakunawe, omakalamanya ga fa evi,noonkondo dhomuku kaadhinangamba.’Ota tu kumike oondunge dhomakwatathanitho giikwankondo, ngoka taga kwathele omahupilo ga koke neendelelo,’Elham Ibrahim komufala gwiikwankondo moAU a ti.Ibrahim okwa ti omahupilo gAfrica ota ga vulu oku mona iihuna ngele iilongo ka yi na olusheno lwa gwana.Opu na ongundu yelongelokumwe lyomalusheno muumbugantu waAfrica SAPP,ndjika ota yi longo nawa.Ope na omakwatathano gopalusheno pokati ka Togo na Benin, opambuwa ashike ehangano limwe ta li wilike iikwankondo yiilongo.Ibrahim ta lombwele Reuters ngaaka.Kuyele nuumvo Ombaanga yUuyuni oya tile Africa okwa pumbwa oku humitha komeho onzo yoonkondo dholusheno yemwene opo a shonopeke ondilo yiikwamalusheno unene sho ompumbwe yolusheno ta yi ende ta yi koko.Elongelokumwe miikwamalusheno muumbugantu wAfrika SAPP olyo limwe lyiipyakidhila pakulanditha muAfrica alihe. Oha li landitha ooperesenda 8,6 dholusheno.Okulanditha olusheno miilongo niitopolwa yimwe menenevi oli li pevi.Kannan Lakmeeharan omukuluntu gwomathaneko gehangano lyaEskom okwa lombwele Reuters kutya oku landitha olusheno oha ku opaleke egandjo lyoonkondo.’Ngele oshilongo shimwe oshi na uupyakadhi iikwawo ota yi vulu oku kwathela’ Lakmeeharan ta ti’Oku ninga ngaaka oto tungu einekelo momahupilo’ South Africa oye omulandithi omunene gwolusheno mongundu ya SAPP, iilongo iikwawo ngaashi Zambia,na Mozambique nayo oha yi landitha olusheno lwahupako kiikwawo mbyoka yi li mompumbwe ngaashi Zimbabwe na Namibia.Opu na woo omalongekidho okutunga oongodhi dholusheno pokati kiilongo Zimbabwe, Botswana ,Namibia na Zambia opo olusheno lwoomegawatts 600 lu vule okulandithwa moshitopolwa. Oongodhi dha Zizabona odha tegelelwa oku manithwa moshitine shahugunina sho 2010.Iilongo oyindji yAfrica ngaashi Ethiopia na Sudan ota yi longele kumwe pangundu miitopolwa oku tunga po itaasi yomalusheno yuukumwe.Ibrahim okwa ti olusheno lwoonkondo dhomeya muEthiopia ota dhi vulu okulandithwa koKenia, Sudan, Uganda na Egipiti.Ethiopia okuna oondama ntano dhokudhiga olusheno mokulongitha omeya na okwa inekela a kale omulandithi omunene gwiikamalusheno meni lyoomvula omulongo.’Uukumwe womalusheno noshowo olusheno lwoku za momeya odho oondunge dhiladhilo mbali,’ Ibrahim ta ti.Oonkondo dhuukumwe noshowo elongitho lyomeya olunzo olunene, komufala a popi okuza mombelewa ye moAddis Ababa.Omulonga gwa Congo ogu na ompito yokugandja olusheno kuAfrica alihe naSouth Africa ota longo pamwe na DRC oku tunga oondama oonene moka, Ibrahim a ti.Ompumbwe yolusheno menenevi oya tegelelwa yi koke sigo opo megawatt 150 000 pokati ka 2007 no 2030 patengeneko lya International Energy Agency.Osha simana kuAfrica okulongela kumwe shi na sha niilonga mbika. Oshoka ngele ku na olusheno ito vulu oku longa sha.