Achebe a kondema omahogololo mu Afrika

ABUJA – Omushangimambo OmuNigeria a simana muuyuni auhe, Chinua Achebe, okwa kondema omaulingilingi ngoka haga ningwa momahogololo miilongo yAafrika e ta indile kaaleli yAafrika ya kale ye shi tseyika kutya ‘opolitika kayi shi iita.’

‘Ondi na okuulika okuuvanayi kwandje okunene kombinga yaashoka tashi inyenge mEnene lyAafrika kombinga yomahogololo,’ Achebe, ngoka a a shanga embo lya simana lyedhina ‘Things Fall Apart,’ osho a lombwele aanankundana ngaaka mu Abuja mOmaandaha.
‘Oshigwana sha putuka omo moka oonkondo hadhi gwandjwa pahalo molwashoka oveta opo yili. Ihe mu Afrika, oshitsa shika sha simana osha fa sha dhimbiwa,’ Achebe, ngoka e na oomvula 78, osho a popi ngaaka.
Okwa ti aanapolitika yAafrika kaye na okutala ko opolitika ong’iita, moka antu ye na okulwithathana.
Achebe okwa kala omugandji guusama omunene kOmapangelo ngoka ga li kiipundu mu Nigeria, ta ti kutya oga koraputa na ihaga lele oshilongo nawa.
Achebe okwa li wo a tindi omapapa niishani oyindji, mbyoka omapangelo ogendji (ngoka ga li koshipundi mu Nigeria), ga li ga hala okumu pa. Embo lye ndika ‘Things Fall Apart’ a li e li shanga momumvo 1958, olya tulokwa momalaka 45 e tali landithwa ookopi dhi li oomiliyuna hetatu.
Omambo galwe ge ngoka ashika ogo: No Longer At Ease, lya shanga momumvo 1960, Arrow of God (1964) na A Man of the People (1966).