ACC a kwata po omuniilonga omukulu gwa Muni gwa Gobabis

OKOMISI yi na sha nekondjitho lyiilonga yOkoraputo/Anti-Corruption Commission (ACC) mEtine lya zi ko oya li ya kwata po omulumentu gumwe a li nale omukwatheli-indjiniya mu Muni gwa Gobabis.

Omulumentu nguka okwa kwatwa po molwashoka ota fekelelwa egandjo lyotendela kaakwanezimo ye. Mu Oktoba na Novemba 2007, Muni gwondooloopa ndjika okwa li okwa li tseyitha ootendela dhokugandja iilongitho yiikwamaluseheno kondoolopa.
Omulumentu nguka Charles Benjamin Jacobs (43) oye aniwa a li ta ungaunga negandjo lyotendela ndjika. Ano oye a li e na oshinakugwanithwa shokutala kutya Ookampani dhini dha gwanitha po shoka tashi pulwa nokufla nee omadhina gadho kOlaata yOotendela (Tender Board).
Jacobs okwa li aniwa a shangitha Okampani yedhina HCE Electrical Materials medhina lya Catharina Jacobs (meme gwe), Ellen Grobler (mumwayinakadhona) na Charles Albertus Jacobs (omonamati). Okampani ndjika oya li ya ningi eindilo lyotendela ndjika yoshimaliwa shOondola/N$348,729 e tayi yi pewa.
Muni gwa Gobabis okwa li a gandja otjeke yoshimaliwa shika kOkampani ndjika. ACC okwa popi kutya osha li sha ka monika mo kutya Jacobs okwa li a longo po uulingilingi, opo a Okampani yawo ndjika oyo awike yi kala ya gwanitha po shoka tashi pulwa.
Otjeke ndjika oya li nee ya ‘sitopwa’ meendelelo manga inayi shendjwa na Jacobs okwa li a thigi po iilonga. ACC okwa ti oshinima shika oya kala noku shi konakona okuza omumvo gwa zi ko, na ondoketa yoshipotha shika oya gandjwa kOmbelewa yOmutamanekei-Ndjayi, moka ACC a popi kutya Jacobs na ningilwe oshipotha.
Jacobs okwa li a holoka mOmpangu ya Mengestrata pu Gobabis mEtine e ta pewa ombooloha yOondola/N$ 8 000. Oshipotha she oshuundulilwa kOmpangu yopashitopolwa, moka ta ka holoka nena a ka popye ngele oku na ondjo nenge aawe moshinima shika.