ACC A kwata po omuniilonga gwUuministeli wUuhaku

OMUNIILONGA gumwe mUuministeli wUuhaku nOnakalathano okwa li kwa tegelelwa a holoke mOmpangu ohela, sho aniwa a gandja iilonga omuntu gumwe ihe okwa futwa ku nakupewa iilonga.

OOmuniilonga nguka okwa li aniwa a ningi ngaaka, ti iningitha ong’omunambelewa mOkomisi yi na sha nekondjitho lyiilonga yokoraputo.
Nelius Becker, ngoka e li omukuluntu gwomakonakono mOkomisi ndjika okwa ti omulumentu nguka gwoomvul 24, ngoka a li wo aniwa i iningi a fa omuniilonga mOshikondo shOonzo dhOpantu mUuministeli wUuhaku na okwa gandja paulunga iilonga yuundalaiva komukwashigwana gumwe.
Becker okwa ti omufekelwa nguka okwa li a kwatwa po kOpolisi ya Muni mEtiyali konioma sho ya yakelwa ko kutya omulumentu nguka okwa pewa ombumbo yOondola/N$300.
Omakonakono moshinima shika oga kuthwa po nee kOkomisi ndjika konima yekwatopo lye. Becker okwa ti omufekelwa nguka okwa li a adhika nokakalata ka ACC kiifundja.
Otaku popiwa kutya omulumentu nguka okwa li ha longitha okakalata haka mokutilitha aantu mboka taye mu pula iilonga mbyoka e ya uvaneke. Omuntu a ningilwa oshipotha shokwiiningitha a fa omunambelewa gwa ACC oha vulu okupewa egeelo lyokufuta oshimaliwa sha thika pOondola omauyuvi omulongo.
Becker okwa ti aanambelewa ayehe yoshili ya ACC oya pewa uukalta, mboka ye na okwiiulika nawa na ngele opu na omalimbililo, omuntu oto vulu okumona uuyelele kuye nenge kOmukuluntu gwOkomisi yawo, Paulus Noa.
Okwa ti Ombelewa yawo oya loptelwa wo natango iipotha ine yaantu ya li yi inigitha ya fa aanambelewa ya ACC.
Yaali oya kwatwa po omanga iipotha mbiyaka iyali, yi li natango tayi konakonwa. Mboka ya kwatwa po yaali oya kwatelwa pOtjiwarongo.