Aawiliki yaaniilonga ya kanithile aaniilonga ongeshefa

AAWILIKI nale momahangano gaaniilonga ota ya konakonwa, omolwa euvathano linasha nehangano lyomapungulo lyaaniilonga, Labour Investments Holdings, Ehangano ndika olyondundahangano yaaniilonga moNamibia, National Union of Namibian Workers.

Ota ku tiwa aawiliki yaaniilonga mbaka, gumwe ngashingeyi eli omupevi minista omanga omukwawo eli ngoloneya yoshitopolwa aniwa oya ethapo nokulandithapo iipambuliko mehangano lya Nam-mic, noku ya meuvathano nehangano limwe opo lya totwapo. Oshiwike shayi ewilikongundu lya LIH olya tulilepevi aawiliki mboka, kokutya, Cleophas Mutjavikua, na Alpheus Muheua sho aniwa ya yonagula onzo ombwaanawa yoshimaliwa kehangano lya NUNW. Ota ku tiwa Mutjavikua na Muheua oya li aakwateli komeho yelandithipo lyiipambuliko yooperesenda omulongo mehangano lya Nam-mic Financial Services nonando aniwa oya li ya pewa omayele yaa heshi ninge. Iipambuliko mbyoka aniwa oya futilwa oodola oomiliona omulongo, noomiliona hetatu dhiimaliwa mbyoka odha longithwa okulanda iipambuliko mehangano lya Mobipay. Ehangano moka LIH a kutha iipambuliko ye ngashingeyi ota ku tiwa olina ongushu yoodola oomiliona 500 ngele andola oku tiwe ota li landithwapo.Mobipay okwa tamekwapo kehangano lyedhina Aantu Investments, lyooyene, Amos Shiyuka, Claus Deckernbrock, Sedrick va Turah na Dee Sauls. Mbaka aniwa oya mono omahangano goludhi ndoka taga longo nawa palwe moAfrica no ya dhiladhila okweetamo ndika moNamibia. LIH okwa landele iipambuliko mo Mobipay mu Kotoba 2010 ndele aniwa ngashingeyi ota kondjo nuudhigu okumona iiyemo, nonando pethimbo oshinima shika sha tseyithwa okwa tilwe, elalakano oku kala nehangano lyaaniilonga lyiithikamena pashimaliwa unene tuu sho iilyo yalyo yimwe ha yi kala noku tilitha kutya ita yi futile uukwashilyo wayo no NUNW.Oonzo meni lya NUNW odha ti Mutjavikua oye aniwa a thiminike opo elando lyiipambuliko mo Mobipay li ye komeho noshowo elandithopo lyiipambuliko mu Nam-mic. Okwa kundanwa kutya kapena omishangwa dhoshigongi shewilikongundu tadhi ulike kutya unake etokolo ndyoka lya ningilwe.