Aawiliki melelo lyoshilongo ya indilwa ya longe noonkondo

OMUPERESIDENDE Hifikepunye Pohamba okwa ti oompumbwe noshowo omashongo ga taalela aakwashigwana ya Namibia oga pumbwa okumonenwa omayamukulo.

Omutse gwoshigwana shika, okwe shi popi pethimbo a egulula omutumba gwotango gwoKabinete moVenduka ongula yetiyali.Pohamba okwa dhimbulutha aakwatelikomeho melelo lyoshilongo kutya, ongundu yoSwapo ndjoka oyo ya pewa oshinakugwanithwa yi kwatelekomeho oshilongo, oye shi pewa kaakwashigwana, oyendji yomuyo yeli aakalimo yokomikunda, momalukanda giipeleki, miilando yomoshilongo.’Aakwashigwana mbaka oya tegelela opo oompumbwe dhawo dhi ili nodhi ili dhi monenwe omayamukulo’ Pohamba ta dhimbulutha ongundu ye yaakwatelikomeho.Okwa ti opo shika shiningwe oonzo adhihe ndhoka epangelo li na odhi na oku longithwa. Pohamba okwa ti iilonga ayihe ta yi longwa moshikondo kehe nayi kale yi na elalakano okuhwepopeka onkalamwenyo yomuNamibia kehe, na yi kale woo yi na elalakano okutidha po uuthigona noluhepo.Shika okwa ti nashi ningwe opo aakwashigwana mboka ta ya mwenya momikunda nomomalukanda giipeleki ya vule okukala monkalamwenyo ombwanawa.Omuperesidende Pohamba okwa popi woo kombinga yokutunga po oshikondo shuulongimapya kutya osha pumbwa okunkondopekwa nokuhumithwa komeho nelalakano oku nawapaleka elongo lyoondya moshilongo.Okwa tsikile ta ti aakwashigwana otaya indile eyakulo momikalo dha yooloka naashika oshi li mondjila sho ta ye shi ningi.’Otuna okuyamukula omaindilo gawo , sho ta tu gandja omeya, uundjolowele, elongo, noshowo okunkondopeka iilonga yengambeko nekeelelo lyuuvu wo HIV-AIDS, okukondjitha iilonga yiimbuluma, noshowo okwaana iilonga mokati komashongo ogendji.Omuperesidende okwa ti ,iinakugwanithwa mbika otayi longwa nawa ngele mboka ye na oshinakugwanithwa otaya longo noonkondo, neitulemo na otaya ningi omalongekidho ga thanekwa nawa nkene taga tulwa miilonga.Onkene okwa lombwele oominista, aapevi minista kutya naya kale aluhe ye shi kutya oshike ta shi longwa miikondo yawo opo ya mone kutya iinakugwanithwa kehe yewiliko oya tulwa miilonga pethimbo.Omuperesidende Pohamba okwa ti ethimbo oshilongo ta shi dhimbulukwa omimvo 20 dhemanguluko, shika nashiningwe pakutala kutya oshike sha longwa po, na ishewe aaleli oya tegelelwa ya ulike kutya oondjodhi dhoshilongo shika odhinipo monakuyiwa. Na ishewe oshilonga shokutunga Namibia na shi tsikile paku koleka oonkondo dhiikondo yepangelo opo yi vule okugandja omayakulo mbala, nonawa.Okwa ti woo nuumvo omvula ota yi loko nawa onkene oshilongo nashi kale shi li komalwilo kombinga yomeya gefundja ngoka taga vulu okunayipika onkalamwneyo yoshigwana ngaashi sha ningilwe oomvula mbali dha piti.Okwa indile kutya omayamukulo taga kalele oga pumbwa okugandjwa kombinga yokushonopeka nkene efundja ta li kala nokuguma aantu moshilongo omvula kehe.