Aavukuland ya pula ekwatho ku muni

AAKALIMO yomOlukanda olupe mOshomeya mOshitopolwa sha Shikoto halu ithanwa Vukuland, oya indile Muni gwawo gwaShomeya, eya kwathele moluhepo lwawo olunene lwomeya nuundjugo.

Oshilyo shimwe shOmokomitiye yokuhumitha komeho Vukuland, Nikanor Kandadi, ta ti kutya olukanda lwawo nduka olwe ya po pazimino lya Muni gwa Shomeya, ndele italu silwa oshimpwiyu kuMuni gwawo notaya indile Muni nguka a kale a kutha ko oshinakugwanithwa shoku ya sila oshimpwiyu pamayakulo agehe gopamuni ngashi shi li moondoolopa oonkwawo moshilongo.Kandadi ota ti kutya sho Aashomeya taya ende taya ningi oyendji ngeyi, oye shi mono kutya oya pumbwa ehala lyokukala lya gwedhwa po. Ta ti oya yi ku Muni gwawo momumvo 2008 ya pewe ehala lili muumbugantu nomuumbugantuninginino wa Nomtsoub, nElelo lya Shomeya olya zimine oshinima shoka. Kandadi ota ti aakalimo mboka ya kala ya pumbwa ehala, oya tameke okukokola ehala ndyoka noku li yeleka nawa tali vulu okutulwa oombashu/omagumbo. Muni aniwa okwe ya noku ya tendela omahala gawo, ano Ooplota dhawo mpoka taya vulu okudhengela iipeleki yawo. Nikanor ta ti oya fulu omukanka gwomunino gwomeya okuza kolukanda lwa CDM sigo omOvukuland moka. Muni te ya pe omeya, ngoka konima yethimbo e ke ga teta ko ishewe molwashoka aniwa otaye ga hepitha. Muni pokati mpoka,okwe ya tulile po uupomba nenge uuketha womeya uyali hau tekwa nokakalata komeya, ka futilwa nale. Kandadi ota ti kutya aantu mboka ya tunga uumbashu wawo mOvukuland moka oyendji nayi, tashi vulika ya uka komayovi gatatu na inaya gwanenwa kopomba dhomeya mbali. Ta ti wo yimwe ndjoka hayi tekwa kaakalimo oyendji yomOvukuland, oya teka nale nokuli naakalimo ohaya mbombolokele nee pwaandjoka ya hupa ko. Kandadi ta ti pokapomba mpoka ngashiingeyi aluhe otapu adhika omukweyo omule, okuza ngaa ongula sigo okongulohi gwaakalimo taya kondjele omeya. Ta ti shampa nee ndee nako taka teka, nena iihuna tayi kala po. Kandadi ta ti aakalimo otaya nana nondatu okumona omeya mpoka. Aanona otaya laata koosikola nenge ya ye inaya lya sha koosikola molwashoka aakuluntu inaya vula okuteka omeya omolwomikweyo omile. Aaniilonga nayo osho, otaya yi kiilonga inaya lya sha yo inayi iyoga, oshoka momukweyo kamu ziwa nziya. Nge wa yi mo oto tokelelwa mo.Kandadi ota ti wo kutya molukanda lwawo moka kamu na uundjugo naamboka wa tungilwe mo ku Muni mpaka naampeyaka, inau patululilwa elongitho natango, na kaye shi kutya omolwashike naanaa Muni i ne wu patululila.Ota ti wo kutya oondjila, ano omapandaanda molukanda lwawo olupe moka kage shi kweendwa, unene tuu kiiyenditho, oge na omamanya. Ta ti oya pumbwa Muni e ga opaleke nomambakumbaku. Kandadi ta ti wo kutya oya pumbwa mo nolusheno, oshoka uusiku kaye iwete noombudhi ohadhi ya mo uusiku noku ya ningila omiyonena, dho tadhi yaka mo iinima yawo manga kwa luudha ngawo.Aakalimo otaya ti kutya ehala lyolyene lya Vukuland ewanawa, ashike olya pumbwa omayakulo gopaMuni.Oshoka ngashiingeyi nande opu na omuntu ta ehama, ooambulansa itadhi thiki ko komagumbo gawo.Taya ti kutya mokuma kamu na wo okapangelo naamboka taya ehama kapu na omiti. Kepulo, Omupopiliko gwa Muni gwaShomeya Stella Imalwa okwa ti kutya shoshene olukanda ndoka Vukuland kalu li po paveta natango noshi na uudhigu ku Muni a kale itula mo naanaa mokupa aakalimo yaahoka omayakulo giihwapo gopaMuni. Imalwa ta ti, aakalimo mboka manga inaya ya hoka, oya lombwelelwe ngeno iinima ayihe yi ende palandulathano lyEhangano ndyoka hali tungile aantu omagumbo lyedhina Saamstaan, ashike aakalimo mboka oya endelele nokutameka taya tungu uumbashu wawo pOvukuland mpoka. Imalwa ta ti, Elelo epe lya Shomeya sho lye ya koshipundi, olya tokola kutya, molwashoka aantu ya ya po nale mpoka, naya pewe ashike omayakulo, manga taku ningwa omalongekidho galwe. Meme Imalwa ta ti kutya opo nee pwa zi ya pewe uupomba womeya mboka uyali, mwa kwatelwa nee hoka ya teyapo.