Aatungi aashona aniwa ya nyokomwa

AANANGESHEFA aashona nooyopokati mboka taa pewa iilonga yoku gandja omaloli gokututa evi kehangano lyokutunga oondjila nenge Roads Contractor Company opamwe nehangano lyedhina Mettalurgical Corporation of China [MCC] oga nyenyeta kutya oga nyokomwa kombinga yiifuta yomaloli gawo.

Elongelokumwe lya RCC/MCC olya pewa iilonga yokutunga ondjila yonomola MR 125 pokati ka Liselo, Linyati, Kongola na Singalamwe. Ondjila ndjika oyi na ookilometa 210. Ongo oshitopolwa shiilonga mbika RCC/MCC oya uthwa opo ya gandje ookondalaka a yilwe komahangano gaaNamibia omashona. Omahangano gane omashona nogopokati oga li ga ithanwa opo ga gandje omiyaluthaneko dhiilonga ya go yo ku gandja oololi dhokututa omavi. Omitengenekwa miyalu ndhika odhi na aniwa oku kwatelamo aahingi yoololi ndhoka, oofuto dhawo, iimaliwa yawo yokukala pehala mpoka tapa longwa, noshowo nee ondando yomahooli ngoka ya longitha. Oyene yomaloli oya ti aniwa oya hala oku futwa oodola 2.70 mokubikemeta yimwe noshowo oodola dha gwedhwapo omugoyi mofulaha kehe. Oya ti oshinima shoka osha li sha uvathanwa noku ziminwa pokati kaanangeshefa aashona nuukumwe wa RCC/MCC. Ndele aniwa oya ka haluka sho ya mona ta ya futwa oodola 2.50 mokubike yimwe mofulaha, shoka ya tala kutya osho ethipo lyombinzi aniwa. Yo oya ti ololi kehe oyi na oku futwa oodola omayovi 90 000 pauvathano lyawo na RCC/MCC ndyoka ya shaina. Mwene gweloli gumwe okwa ti iimaliwa mbyoka ta ya futwa ngashingeyi ita yi vulu oku futa iifuta ye yokomwedhi yololi ye ndyoka ha yi futilwa oodola omayovi 68 000 komwedhi. Omanga ye ha futwa ashike oodola oamyovi 27 000. Omunangeshefa nguka okwa ti miimaliwa muka ita vulu woo okufuta mo ondjambi yomuhingi gwe noshowo iimaliwa yomahooli, na oku na oku hehela iimaliwa palwe opo a vule oku pita. Omukuluntu gwa RCC, Engelhard Haihambo okwa ti kapena esiku aanangeshefa mbaka ya pulilwe ya gandje omitengenekwa miyalu dhomaloli gawo, na oya li ya tseyithilwa kutya ota ya ka futwa oodola 2.50 mokubike yimwe omanga inaa ya tameka iilonga. Okwa ti ofuto iha yi gandjwa paloli ndele opa fulaha ndjoka ya humbatwa noshowo oshinano shoka sheendwa kololi ndjoka.Haihambo okwa ti konima yoshigongi sha ningilwe pehala lyiilonga, aangeshefa mbaka oya pelwe ookondalaka dhiilonga dha kankamekelwa kofuto yoodola mbali noosenda 50.Omunangeshefa gumwe ngoka a li ena okufutwa oodola omayovi 27 000 okwa li a ti okwa hala oku futwa oodola omayovi 392 000, molwaashoka kali a uviteko nkene ofulaha noshinano ha yi yalulwa mokuhumbata omavi. Haihambo okwa ti noshinano shokilometa yimwe noshinkwanu mbali noshowo ookilometa 2,7 itashi vulika omuntu a mone iiyemo yi thike mpoka momwedhi gumwe.Okwa ti omiyalu dhili mokambapila komafutilo odhi thike pamwe nofulaha yeendithwa noshinano sheendwa.