Aatotimpango yamwe ya faula iilonga metine lya ziko

OSHIGONGI shOpashigwana metine lya ziko, osha hulile ondjilakati molwaashoka omwa li aatotimpango aashona opo shi vule okutsikila pamauthompango.

Etine olya li esiku etitatu sho egumbo lya tameke iilonga yalyo yokutota oompango nokudhi kundathana konima sho aatotimpango, ya yi le mefudho lyoomwedhi mbali pethimbo lyokufu.Omupopi megumbo omutiyali, me Doreen Sioka okwa laleke aatotimpango mboka yi ile kiilonga yokutota oompango ya shune komagumbo pondatu, yokomatango gesiku ndyo. Aatotimpango oya tumwa komagumbo shaashi mEgumbo ka mwa li oyendji yomuyo mboka ye na oonkondo dhokuninga omatokolo.Egumbo olya pumbwa aatotimpango 37 yomaatotimpango omi 72 mboka ye na ewi lyokuhogolola.MuJuni nuumvo egumbo olya li lya zimbuka iikando iyali meni lyiiwike iyali, ina li longa, omolwa aatotimpango yokuninga omatokolo ina ya gwana po.Metine aatotimpango mboka ye na ewi lyokutokola mOshigongi shOpashigwana oya li mo ashike 33 yakambela aatotimpango yane.Pethimbo ndika Oshigongi shOpashigwana ota, shi ikundu, ontotwampango yina nasha nengambeko lyokulongitha omakaya moshilongo, ndjoka ya tulwa poshitaafula kOminista Yuukalinawa omusamane, Richard Kamwi. Omundohotola Kamwi sho a gandja omatompelo kutya ontotwampango ndjika oya pumbiwa, okwa li a indile aatotimpango ya se oshimpwiyu kutya othanekwampango ndjika oya pumbwa oku kundathanwa neendelelo.