Aatotimpango yalulilwa kelongitho nayi lyiikolitha

AATOTIMPANGO oya mono kutya oshinakugwanithwa shawo oku keelela nokumweneka mbala onkalo yuukolwe ndjoka tayi ninginitha oshigwana sha Namibia muupika wiikolitha.Nonando yamwe yomaatotiveta moparliamende ya Namibia oyi iitaala kutya elongitho lyiikolitha nayi oshinima shopaumwene, nokehe omuntu ota vulu oku shi kondolola mwene, omuwiliki gwa All People’s Party, Ignatius Shixwameni okwiitaala kutya epangelo oli na oku kondolola oshinima shelanditho lyiikolitha.Okwa ti epangelo oli na okusa oshimpwiyu kutya iikolitha kayi li po okulongithwa kaantu yi,i yonagulepo nayo.

Okwa ti aatotiveta kayena komapepe ga gulwe hoka taya lilile uupyakadhi mbuka, oshoka yo, oyo aapombanda mboka yena okustopa elongitho nayi lyomalovu.Okwa ti aatotimpango naya pulakene komakemo goshigwana tashi keme kombinga yomalovu taga adhika shaampoka nonuupu, kutya ngaaka egumbo etiyali kehe omuna ondunda yomalovu. ‘Oshigwana otashi indile tse aawiliki tu stope oshinima shoka’.osho Shixwameni ati.Omanga aatotimpango ya li ta ya kundathana oshinima shiikolitha tayi yono oshigwana, ongundu yaalandithi pehala lyomalandithilo lyedhina Herero Mall moKatutura oya li ya nyanya nokuya koombelewa oonene dhewiliko lyoshilando sha Venduka taya indile opo ootundi dhokungeshefa dhi lelepekwe.Odhindji dhomoongeshefa pehala ndyoka ohadhi landitha iikolitha. Shixwameni okwa gandja ethaneko kutya oshinima shoka shina oku ningwa tango osho okwiindika osasiona dhomahooli dhaa landithe wo omalovu, noku landitha ashike omahooli ngoka ogo oshinenenima shiilonga yadho.Okwa thaneke ishewe kutya oombapila dhospeciala dhoku landitha omalovu nadho nadhi kuthwepo, po na pa kale woo engambeko lyomwaalu guundingosho womalovu mboka wa pitikwa oku landitha mehala lyontumba. Okwa gandja oshiholelwa shepandaanda lya Eveline popepi no Goreangab moVenduka, ndyoka lya ninga ehala lyoongeshefa dhomalovu oku za mokukala ehala lyomagumbo. Ominista yOonakulwa Aakulu , Nickey Iyambo okwa indile opo osheetwapo shomutotimpango gwo Swapo, Ben Amadhila ,kelongitho nayi lyiikunwa, shi kundathanwe muule noneitulemo. ‘Atuheni otwa nyengwa’ Iyambo osho a igidha ‘Otuukeni peni?Ota mu ka za oshinima oshiwanawa nenge otatu tsikile okuuka melambo?’ osho Iyambo a pula.Okwa thaneke kutya okangundu koparliamende naka ninge ekonakono moshilongo ashihe kombinga yelanditho lyiikolitha nelongitho lyayo. Ekonakono ndika na li ningwe mekwathelo lyaanawino, ngaashi aalongelwe, aakwambepo,noshowo aakwashigwana, opo pu thikwe ketindi lyuupyakadhi mbuka welongitho nayi lyomalovu.Opwa li woo pwa thanekwa kutya na pa ningwe oshigongi shopashigwana kombinga yelongitho nayi lyiikolitha, ndele, Iyambo okwa ti shika osha pumbiwa oku ningwa konima yekonakono miitopolwa ayihe yoshilongo. Okwa tsu omuthindo kutya oshigongi shoka osha pumbwa oku kala shina uumbangi wa kankamekelwa komapekaapeko gadhengambanda.Omutotimpango gwo Swapo moparliamende, Sylvia Makgone okwa thaneke kutya elongitho nayi lyiikolitha na li tale woo nkene ndika ha li gumu aakiintu naanona. Okwa ti olundji ngele okakomitee koparliamende kuukashike kookantu nofamili ka talelepo omahala miilando, omakemo kombinga yomalovu , otaga ulike omaipulo kombinga yuundingosho mboka wu li momaushiinda, ndele olwindji aalandi pomahala ngoka oyo aanona.