Aatotimpango ya faula iilonga ishewe metitatu

IILYO yOshigongi shOpashigwana mbyoka yi iile kiilonga yokutota oompango metitatu oya shunithwa ishewe komagumbo konima yokutegelela ngele egumbo ota li mono oquoruma.

Aatotimpango oya tegelele uule wominute 30 ndele aatotimpango yalwe ina ya thika opo egumbo li vule okutsikila iilonga yalyo.Osha li esithahoni sho egumbo lyoparliamende inaa li vula okulonga sha oshikando oshitine konima sho egumbo lya tameke iilonga mo 15 ga Septemba nuumvo.Omunashipundi shegumbo omusamane, Theo Ben Gurirab okwa lombwele aatotimpango kutya naye mu lombwele kutya oyi itula mo mokutsikila iilonga megumbo nenge ahawe.’Otandi tumu egumbo, komagumbo sigo ometiyali lyoshiwike tashiya, nonda tegelela esiku ndyoka ndi uve kutya omwa tokola po shike oku ya komeho’Onda hala mu popye ngele iilonga yegumbo na yi tsikile.Oshigongi shOpashigwana oshina aluhe oku kala nomwaalu gwaatotimpango ye na ewi lyetokolo ye li 37 maatotimpango omi 72, opo oonkundathana noompata adhihe dhi tsikile komeho.Ngele kapena aatotimpango ye na oonkondo dhomatokolo nena oshigongi ita shi vulu okuya komeho.MuJuni nuumvo aatotimpango oya faula kaayena matompelo lwaali meni lyiiwike iyali onkene poompito ndhika mbali oonkundathana odha kalekwa.Sho kaa pwali oquoruma megumbo oshiwike shika, Ominista yOonakulwa Aakulu, Ngarikutuke Tjiriange ina vula oku tula ondungethaneko ye yina sha noquoruma poshitaafula. Tjiriange okwa thaneka kutya ompumbwe yoquoruma yi kale ta yi dhengele uuna ndoka egumbo lya pumbwa okuninga etokolo ta li pitile mokuhogolola, ndele ngele egumbo ota li kundathana ashike, oshinima shika shompumbwe yoquoruma ina shi manga egumbo li tsikile ngaashi osho hashi ningwa pethimbo ndi.Opo shika shiningwe otashi pumbwa ekotampango lya Namibia li lundululwe, molwaashoka sigo oompaka ota li ti aatotimpango 37 ye na oonkondo dhoku ninga etokolo oye na okukala megumbo.