Aatiligane onkee taya kuthwa oofaalama

HARARE – Onkundana okuzilila ku Harare sha Zimbabwe otayi ti kutya Epangelo otali ka ninga po omakonakono kombinga yomapopyo omatalala kutya aanafalama yamwe yaatiligane oya kuthwa oofalama dhawo.

‘Ota tu yi koofaalama ngula tu ki italele ko tseyene,’ Omupeviprimaminista Arthur Mutambara, osho a lombwele aanankundana ngaaka mEtine lyoshiwike sha zi ko.
Mutambara okwa ti osipana yaanambelewa otayi ka ya koofaalama hoka yi ka tale kutya oshike sha ningwa po.
Okuza mpoka sho mu Zimbabwe mwa totwa Epangelo lyopaukumwe mu Febuluali nuumvo, aanafaalama yamwe yaatiligane oya kala nokupopya kutya otaya kuthwa oofaalama dhawo,nonande ngashiingeyi Omupresidende Robert Mugabe oya topolelathana oonkondo dhokupangelo na Morgan Tsvangirai mEpangelo ndika.
Omathimbo ga zi ko, Mutambara okwa li a ningi oonkundathana nOmukalelipo gwAamerika mu Zimbabwe, James McGee, ngoka a li holola euvonayi lye kombinga yoshinima shika.
Omugandjimulombo gwa Tsvangirai, James Maridadi, okwa ti kutya Omuprimaminista Tsvangirai, okwa indila indila Mutambara a kwatele komeho omakonakono kombinga yomapopyo ngaka.
Omwedhi gwa zi ko, Tsvangirai okwa li a kondema omakutho ko goofalaama kaanafaalama yaatiligane, ta ti kutya mboka taya ningi ngaaka otaya ka mangwa po.
Nande ongaaka, Mugabe okwa ti kutya oprograma yetopolululo lyevi otayi tsikile. Elalakano lyOprograma ndjika, ya li ya tilwa miilong momumvo 2000 – okutula aaluudhe moofaalama dha li dhaatiligane dhoohektara dhi li 4 000, ihe oshinima shika osha ningwa pamukalo tagu ningi nayi aatiligane na osha li sha shunitha pevi iilonga yuunamapya moshilongo , molwashoka aantu mboka ya li ya pewa evi kaya li ye na ontseyo miilonga yuunafalama.
Nonande Zimbabwe okwa li ha longo epungu lya gwana oshilongo ashihe nokulanditha po ndyoka lya hupa po, ngashiingeyi etata lyAaZimbabwe otaku popiwa kutya oya pumbwa iikulya.
Epangelo epe lyopaukumwe mu Zimbabwe olya hala okweeta aatalelipo oyendji moshilongo, ihe iikwathelilongo oyindji inayi hala nawa okugandja oshimaliwa koshilongo shika, omolu omakuyunguto ngoka ge li mo natango.
Mutambara okwa ningi eindilo ku Amerika a hulithe po oondjindikila dhoka a ningila Mugabe nookuume ke.
– Nampa-AFP