Aashakati yaali, Omungwediva gumwe nOmundangwa gumwe ya kwatelwa mOshikango ya yuga

OPOLISI ya Hangwena oya kwata po Aashakati yaali, Omungwediva gumwe nOmundangwa gumwe konima sho ya yugu ya homata omunangeshefa gwoOmuchina pOshikango mOshitopolwa sha Hangwena ongula onene yOsoondaha ya zi ko (04.01.2009), omanga gumwe gwomuyo a fadhuka po nota kongwa nee kOpolisi noonkondo, Omupopiliko gwOpolisi mOshitopolwa sha Hangwena Shisaande Abner Kaume Iitumba a ti ngawo.

Shisaande Iitumba ta ti kutya aalumentu aagundjuka mbaka yane ya kwatwa po kOpolisi moshinima shika oyo nee Markus Kuugongelwa gwoomvukla 29 gwomUupindi mOshakati mOshitopolwa sha Shana, Frans Abraham a tseyika wo nedhina Ben gwoomvula 26 a zile mOngwediva mOshitopolwa sha Shana, sakaria Simon, a tseyika wo nedhina Sacky gwoomvula 27 a zile mu Kandjengedi mOshakati mOshitopolwa sha Shana noshowo Leonard Tuhafeni Shamandilipo Shipopyeni, a tseyika wo nawa nedhina One -Way (Wanuwei) gwoomvula 22 gwomOndangwa mOshitopolwa sha Shana.
Shisaande Iitumba ta ti kutya aamentu mbaka oyi iteyele megumbositola lyAachina mOshikango moshitopolwandoolopa ya Shikango shoka hashi ithanwa Oshikango China Village Namba 15, mo Lei Zhang Shop. Ya dhenge mo tango ekende limwe nokuteta iitenda yalyo noshikonde shokuteta iitenda ndele taya nukile meni lyegumbo lyAachina moka ya adha Aachina ye li yatano ya kotha kwali. Taya thiminike Aachina mboka ye ya pe iimaliwa ayihe mbyoka ye na megumbositola lyawo moka, nange itaye shi ningi oteye ya dhipaga. Aachina moluumbanda nomolu okwaadhikilila nayi ngawo, oye ya pe iimaliwa mbyoka ya li nayo megumbo moka. Aamentu mboka sho ya pewa iimaliwa ngawo, oya kwata Aachina ayehe mboka noku ya manga komaako nokomilongu. Taya patulula omuyelo gwokuya pondje, taya patele mo Aachina mboka nokufadhuka po niimaliwa yawo.
Oshiningwanima osha lopotwa nziya kOpolsi Osoondaha tuu ndjoka, noya yi momakonaakono nomolukongo olunene. Osoondaha ndjoka Opolisi inayi mona po sha kwali. mOmaandaha geti 5 Januari 2009, Opolisi oya mono uuyelele wu li nawa mboka fala sigo omekwato lyaamentu mbaka yane, ya tumbulwa metetekelo, ye gumwe ta fadhuka po. Shisaande Iitumba ota ti mboka yane ya kwatwa oya adhika ya dhengela nale okapaleki kawo nIipeleki ye yi landa niimaliwa mbyoka ya yuga Aachina ongula onene yOsoondaha ndjoka yeti 4 Januari 2009. Okapeleki hoka oya adhika nee ye ka dhengela kolukanda lu li muuninginino wOshikango talu ithanwa Oshipwatapwata. Oya adhika ya landela mo Okila yokutalaleka iikunuwa nosho tuu, taya landele mo omalovu, omakende noya li ya ithana ookuume kawo yamwe pamwe nokunyanyukilwa pamwe sho ya longa aniwa oshimati ngawo. Sho nee ya kwatwa ngawo, Shisaande Iitumba ta ti, aamentu mboka oya adhika nOoN$8052.12, Eekwanza 1085, Iimaliwa yAachina yi li 101,Oodola dha America dhi li U$710, Eetebe dha Botswana dhi li 10. Iipeleki mbyoka ya ladele oya li 35. Taya landa Oombete mbali, , Eepaala 14, eemweelo mbalai, Okila yimwe ndjoka ya tumbulwa metetekelo, Eshina lyokuyoga iikutu, Iipilangi 7, iitenda (iikulo) yOomweelo iyali , Olama yEkende, Oshisaaha, Iikuuusinga 3 , oshilapi shokombete Eduufeta limwe , ohamala, okapakete koomboha noshowo nee iikuliwa oyindji lela ngashi omalwishi, omausila omakoloni, esopa nosho tuu nosho tuu.
Oya holokele nee mOmpangu ya Mangestrata pEenhana ongula yeti 8 Januari 2009 noshipotha shawo oshuundulilwa komeho omolu omakonaakono gOpolisi. Inaya pewa uuthemba wokwiifutila mo. Iitumba ota ningi eindilo kwaangoka a fadhuka po kutya ina etha nande a kongwe kOpolisi, niigandje ashike ye mwene manga inaku toka. Ta ti oku shin wike nawa Shisaande Iitumba te mu lombwele wo kutya iimaliwa mbyoka e na ine yi longitha po nande, otashi ke mu etela uupyakadhi. Komanda yOpolisi mOshitopolwa sha Hangwena Komufala gwOpevi gwOpolisi Armas Shivute ota pandula noonkondo Opolisi ye sho yalonga nawa nonuudhiginin i ngeyi mokukwata aamentu mbaka meendelelo ngashi tashi vulika. Komufala gwOpevi gwOpolisi Shivute ta pandula wo oshigwana shoka sha longele kumwe nOpolisi moshinima shika. Ta indile koshigwana, unene tuu shoka oshigundjuka shi hulithe po iilonga yuukawalala mbika, oshoka otaya nyatekitha ashike omadhina gawo nokuuhala taya uvitha nayi aakwashigwana mboka ya hala okukala mombili nomengungumano.