Aasamane Jerry, Utoni na !Naruseb pombanda momahogololo

KAKU na ongundu yopolitika ‘yi li puuyelele no yi na uudemokoli’ okuyeleka noSwapo,Amushangandjai gwoSwapo Pendukeni Iivula-Ithana a ti pethimbo ta tseyitha omadhina gookandidate omi 72 ndhoka tadhi kalelepo ongundu ndjika moshigongi shopashigwana konima yomahogololo ga Novemba nuumvo.

Nonando omwaalu omunene gwaawiliki aakulu yongundu yoSwapo ota gu monika gu li pombanda yomusholondondo gwookandidate noyendji osha yela ota ya shuna moshigongi shopashigwana konima yehogololo, Ominista yAagundjuka, Willem Konjore noMinista Yiilonga, Helmuth Angula mboka ye li 67 no 70 momusholondondo osha, ye la kutya, ka ye na ompito okugalukila moshigongi shopashigwana omvula ta yi ya.Shimwe ta shi kumitha oshika kutya Ominista yOmavi omusamane Alpheus !Naruseb ngoka a li ponomola onti 20 nale okwa londo a yi pombanda sigo oponomola ontintatu pamahogololo ngoka gomehulilo shiwike, okwa landula Ominista Yomagumbo omusamane Jerry Ekandjo ngoka e li ponomola yotango noshowo Utoni Nujoma ngoka oye omutiyali pamahogololo.Omahala gaaleli mbaka yatatu oga lunduluka e ta ga ningi ehala etine, etitano netihamano, molwaashoka oga undulilwa pevi oondondo ndatu, sho omupevi peresidende gwSwapo, Hage Geingob, Amushangandjai Pendukeni Iivula Iithana, nomupeha gwe Nangolo Mbumba ya tulwa pomahala gawo ngaashi tashi uuthwa kongundu.Iivula Ithana ota ti ‘Swapo ongundu yi na uudemokoli no ya koka melalakano lya yo, oku humitha komeho uuwanawa waaNamibia ayehe.Onkene ita shi kumitha ngele oto mono onkalamwenyo ta yi thikama uuna pwa popiwa oshigongi oshinene shongundu ta yi pangele ngaashi oshigongi shokuhogolola ookandidate dhoSwapo.Iivula Ithana okwa ti aantu 211 oya kala pomahogololo ngaka gomongundu, pohotela yimwe moVenduka, ndele aakalelipo ashike 205 mboka oyo ye na uuthemba woku hogolola na ka pwa li uukalata womahogololo wa yonuka.’Kwaamboka ka ye li momusholondondo, onda hala okweendulula iitya yomuperesidende Pohamba sho a ti oSwapo oya piti momukalo guudemokoli, naamboka iinaaya hogololwa ina ya dhiladhila oya ethiwa nenge ota ya ningwa nayi.’ Iivula Ithana tati.Okwa indile aayambidhi yoSwapo ayehe ya ninge iikonga yomahogololo yopambili, tati inaya gandja ompito kaahindi opo ya piyaganeke iikonga mbika.Iilyo yoSwapo oya li yuudha mombelewa yiigongi ongula yoSoondaha ya tegelela iizemo yomahogololo.Aanelago mboka ta ya shuna mo moparliamende oya li ya nyanyukwa no taya minikathana, omanga mboka ya kana ngaashi Ominista yuukashike Kookantu, Marlene Mungunda,nOmupevi minista gwegameno Victor Simunja oya li ye na omukumo nando oya kana.Ongundu yoSwapo oyi na iipundi omilongo 55 mOshigongi shOpashigwana.Okugaluka kwo Minista kwa li Yomauyelele omusamane Ben Amathila ngoka e li ponomola 54 melandulathano ota shi vulika kukale oku dhigu no ta shi ikwatelele komwaalu gwiipundi mbyoka ongundu ta yi ka mona.